Кардынал Сара: беднасць таксама можа быць пазітыўнай рэальнасцю
Кардынал Рабер Сара,
старшыня Папскай рады “Cor Unum”, занепакоены пашырэннем скрайнай беднасці ў свеце.
Ён адзначыў, што, хоць беднасць заўсёды была рэальнасцю для чалавецтва, яе спараджае
сам чалавек, ствараючы “несправядлівае асяроддзе”, такую арганізацыю эканомікі, якая
спрыяе выключна багатым, а бедных робіць яшчэ больш беднымі. На думку ватыканскага
іерарха, “беднасць будзе існаваць заўсёды, але гэта мае не толькі адмоўныя аспекты”.
“Мне здаецца, - сказаў кардынал Сара ў інтэрв’ю Ватыканскаму радыё, - што беднасць
таксама можа быць пазітыўнай рэальнасцю, таму што гэта лад жыцця ў цвярозасці, прастаце,
якая не загрувашчвае наша жыццё вялікай колькасцю рэчаў, якія не з’яўляюцца неабходнымі”.
Іерарх адначыў, што ў многіх бедных краінах людзі больш вясёлыя, больш упэўненыя ў
жыцці, чым тыя, у якіх ёсць усё. Барацьба з беднасцю, паводле старшыні Папскай рады,
гэта барацьба за годнасць чалавека і хаця б мінімальна неабходнае матэрыяльныя рэчы,
якія ёй спрыяюць.
Кардынал адзначыў, што Касцёл, як ніякая іншая арганізацыя
ў свеце, імкнецца палепшыць умовы жыцця і працы насельніцтва, і не толькі каталіцкага.
Ствараюцца школы, медыцынскія ўстановы, існуюць сельскагаспадарчыя ініцыятывы. Менавіта
адукацыя, на думку кардынала Сара, з’яўляецца самай прагрэсіўнай формай барацьбы з
беднасцю, бо яна дапамагае паглядзець на рэчы па-іншаму, развівае чалавека да прагрэсу
не толькі духоўнага, але і матэрыяльнага.
Іерарх падзяліўся досведам сваіх
сустрэч з людзьмі патрабуючымі падчас паездак па свеце. Ён адзначыў, што сёння людзі
чакаюць не столькі дапамогі матэрыяльнай, колькі наталення духоўнага голаду.