Krishtlindja me Papën: “ Koha dhe vendi i lindjes së Jezusit nuk janë mitike!”
Në qendër të vëmendjes, në pjesën e 11-të të rubrikës sonë radiofonike “Krishtlindja
me Papën”, është tema “ Koha dhe vendi i lindjes së Jezusit nuk janë mitike!”.
Në emisionin e kaluar në pjesën e 10-të të kësaj rubrike tonëishin Betlehemi,
vendlindja e Jezusit dhe regjistrimi i përgjithshëm i popullsisë së Perandorisë romake,
nën sundimin e Cesar Augustit. Pyetja e parë “kur u krye regjistrimi?’, që e bënë
shumë dijetarë, u sqarua lehtë: “Regjistrimi u bë në kohën e Herodit të Madh, i cili
vdiq në vitin 4 para Krishtit, dhe të pasardhësve të tij. Fillimi i llogaritjes së
kohës para e mbas Krishtit, zë fill me murgun Dionisi i Vogël (vdekur rreth vitit
550), i cili gaboi shumë pak në llogaritje, duke e caktuar datën e lindjes së Jezusit
ndonjë vit më vonë. Polemika të shumta lindën për dy data të tjera. Sipas Jozef
Flavios, studiues i shquar i historisë judaike të kohës së Jezusit, regjistrimi u
bë në vitin 6 pas Krishtit, nën qeveritarin Kuirini e, me që ishte fjala për vjelje
taksash, pra çështje parash, i dha shkas shpërthimit të disa kryengritjeve në Galilé
(Cfr Vap 5,37). Veç kësaj, sipas të njëjtit studiues, Kuirini duhet të ketë
qenë aktiv në mjedisin siriako-judaik vetëm në këtë periudhë, e jo më parë. Por këto
fakte nuk na bindin plotësisht, mbasi ka të dhëna, sipas të cilave Kuirini qe dërguar
nga Perandori në Siri, me detyra të ndryshme, që në vitin 9 para Krishtit. Prej këndej,
na duken më bindëse shpjegimet e disa studiuesve të tjerë, si për shembull Alois Stöger,
sipas të cilëve regjistrimi, në rrethanat e asokohshme, zgjaste me vite të tëra. Pastaj
duhet kujtuar edhe se ky regjistrim u realizua në dy etapa: së pari, u regjistruan
pasuritë e patundshme; së dyti, u caktua sasia e taksave, që duheshin paguar. Jezusi
lindi pikërisht në etapën e parë; e dyta qe shumë më e trazuar, gjithnjë e ngarkuar
me kryengritje. Së fundi vërehet edhe se për pagesën e taksave nuk do të ishte
e nevojshme që njerëzia të lëvizte nga vendbanimi. Ndërsa për regjistrimin e pronave,
po. Prej këndej, hamendësohet se Jozefi, pinjoll i shtëpisë së Davidit, duhet të kishte
toka në Betlehem, prej këndej, duhet të ishte atje, kur të regjistroheshin pronat.
Gjithsesi nuk është aspak e lehtë të hyjmë në të përditshmen e një organizmi kaq të
largët nga ne e kaq të ndërlikuar, siç ishte Perandoria Romake. Rrëfimi i Lukës
mbetet më i besueshmi, sepse i bazuar mbi kërkime tejet të kujdesshme. Pa harruar
edhe se ai ishte shumë më pranë burimeve e ngjarjeve, sesa jemi ne sot, pavarësisht
nga arritjet e mëdha në fushën e historisë. Duke e lidhur lindjen e Jezusit me perandorin
August, Luka, me vetëdije, krijoi kuadrin historik e njëherësh, edhe teologjik, për
ngjarjen, që përgatitej të tregonte në Ungjillin e tij. Shkruan ungjilltari: “Në
atë kohë Cesar Augusti shpalli një dekret-ligj, sipas të cilit do të regjistroheshin
mbarë banorët e perandorisë. Ky regjistrim i parë u bë në kohën kur Kuirini ishte
zëvendës-perandor në Siri” (Lk. 1,3). Por epoka kur lindi Jezusi, mund të
përcaktohet edhe duke u nisur nga predikimi i tij i parë publik, kohë, të cilën Luka
e shënoi me kujdes e saktësi të padiskutueshme. Ishte viti i pesëmbëdhjetë i Perandorisë
së Cesar Tiberit, kur Ponci Pilat sundonte Judenë e Herodi ishte tetrark i Galilesë,
ndërsa Filipi, i vëllai, tetrark i Ituresë e i krahinës së Trakonitides, e Lisna,
tetrark i Abilenës, nën kryepriftërinjtë Ana e Kajfa”(Lk 3,1). Me rëndësi,
edhe një element tjetër. Urdhëri i Augustit për regjistrimin tatimor të të gjithë
banorëve të ecumene-s, e detyron Jozefin, bashkë më fatin e tij, Marinë, të shkojë
në Betlehem, qytet i Davidit, duke i shërbyer, kështu, përmbushjes së premtimit, që
Hyji e vuri në gojën e Mikesë Profet, sipas të cilit Bariu i Izraelit do të lindte
pikërisht në këtë qytet: “E ti, Betlehem i Èfrata, më i vogli ndër fise të Judës: Prej
teje do të dalë ai, të cilit do t’i përkasë sundimi i Izraelit. Prejardhja e
tij është e lashtë zë fill që prej ditëve të largëta” (cfr. Mikea, 5,1-3). Pa
e ditur fare, perandori ndihmon në përmbushjen e premtimit: historia e Perandorisë
romake dhe historia e shëlbimit, që Hyji e nisi me Izraelin, depërtojnë tek njëra-tjetra.
Historia e popullit të zgjedhur nga Zoti, e kufizuar vetëm në Izrael, hyn në hapësirat
e pakufizuara të botës, në historinë universale. Hyji, tashmë Zoti i Izraelit edhe
i gjithë popujve, i prin, si udhëheqës i vërtetë, mbarë historisë njerëzore. Arrijmë,
kështu, në përfundimin se koha dhe vendi i lindjes së Jezusit nuk janë mitike! Jezusi
nuk lindi, as u duk në publik në ‘një herë e një kohën” e papërcaktuar të mitit. Ai
i përket një kohe, që mund të datohet me saktësinë më të madhe dhe një mjedisi gjeografik,
të përshkruar saktësisht. Në Të Logos (Fjala), Arsyeja krijuese e të gjitha sendeve,
hyri në botë. Fjala e mishëruar u bë njeri, e kësaj ngjarjeje i përkasin edhe rrethanat
e vendit e të kohës. Feja lidhet me këtë realitet konkret, edhe pse pastaj, për virtyt
të Ngjalljes, hapësira kohore e gjeografike kapërcehet e ‘Zoti, që shkon para Apostujve
në Galile’ (Mt 28,7), na prin në pafundësinë e hapur të mbarë njerëzimit.