Të dielën fillon nëntëshja, që i paraprin Krishtlindjes
Në të Dielën III të Ardhjes, e cila quhet edhe e Gëzimit, fillon nëntëshja, që i paraprin
Krishtlindjes. “Zoti është afër!” thuhet në Leximin e dytë të liturgjisë së sotme.
Gëzimi i krishterë nuk është shpërfillje e thjeshtë, argëtim, ose mungesë shqetësimi,
por është vetëdije se, edhe në travajët më të vështira, nuk duhet ta ndjejmë veten
të braktisur, sepse kemi mes nesh një Shëlbues të fuqishëm, të aftë të na ndihmojë
në problemet e jetës, siç thotë Leximi i parë. Çdo njeri mund t’i njohë shenjat
e vogla, por të përditshme, që Zoti na jep. Hyji nuk vjen me ndonjë rrufe, që shkatërron
e djeg, duke ndryshuar rendin e natyrshëm të ngjarjeve të kësaj bote, por na paraqitet
me Fjalën e vet, e cila ndryshon zemrat. Si një shpatë me dy tehe, ajo e përshkon
zemrën e njeriut, por e pastron atë nga mëkati, që bën fole në ndërgjegjen e secilit,
duke na ftuar të jetojmë thjesht e me nder. Krishti, Foshnja Hyjnore që presim
të lindë, është Lajmi i i Mirë i shpëtimit: në duart e Tij mund t’i lemë të gjitha
nevojat e të gjejmë dritë e forcë për udhën e jetës. Ai na dhuron paqen e zemrës e
lumturinë, sepse na siguron se kemi pranë një shok, një udhëheqës, një mësues, që
na tregon udhën drejt shenjtërisë.