Tweet-i i parë i Papës, në audiencën e përgjithshme. Imzot Raspanti: me Twitter-in,
Papa është i pranishëm në çdo shesh të botës
Benedikti XVI shkroi të mërkurën, gjatë audiencës së përgjithshme, kushtuar ardhjes
së Hyjit në tokë e mënyrës se si e pret bota, mesazhin e tij të parë në rrjetin shoqëror
Twitter, në internet, ku tashmë e ndjekin gati 2 milion vetë. Në atë çast, së bashku
me Papën, ndodheshin edhe 5 të rinj nga 5 kontinentet e botës, për të nënvizuar universalitetin
e këtij gjesti. Gjatë po asaj dite, Ati i Shenjtë iu përgjigj tri pyetjeve, që i kishin
ardhur nga ndjekësit. “Si ta jetojmë fenë në Jezu Krishtin në një botë pa shpresë?”
– pyeste njëri. “Me sigurinë – përgjigjet Papa me 140 shkronjat e lejueshme për një
tweet – se kush beson nuk është kurrë vetëm. Zoti është shkëmbi i sigurtë mbi të cilin
duhet ndërtuar jeta e dashuria e Tij është gjithnjë besnike”. Në përgjigjen tjetër,
Benedikti XVI na fton ta jetojmë Vitin e Fesë, duke e dëgjuar e duke folur me Jezusin,
por sidomos duke e takuar në më nevojtarët. Në mbrëmje, tweet-i i fundit i Atit të
Shenjtë i përgjigjej pyetjes së një besimtari, që donte të dinte se kur mund të lutej,
ndërsa është i zënë gjithnjë me çështjet e punës, të familjes e të botës. E Papa i
thotë t’ia ofrojë Zotit çdo gjë që bën, t’i lutet ta ndihmojë në çdo rrethanë të jetës
së përditshme e të kujtohet se e ka Hyjin gjithnjë pranë. Prania e Benediktit
XVI në Twitter është ftesë për të gjithë besimtarët, të cilët duhet ta ungjillëzojnë
kontinentin dixhital. Kështu mendon njëri nga ipeshkvijtë e regjistruar në këtë rrjet
shoqëror, ipeshkvi i Açireales në Itali, imzot Antonio Raspanti: Prej disa
dhjetëvjeçarësh, mbajmë mbi vete opinionin se meqë Kisha ecën ngadalë, meqë nuk është
aq instinktive, atëherë vetëm sa u shkon mbrapa të rejave, por Papët, të gjithë papët,
sapo janë zbuluar teknologjitë e reja, kanë qenë gjithnjë të gatshëm t’i përdorin,
sepse Kisha sheh në to të mirën e njeriut, bukurinë e gjithësisë. Rrjetet shoqërore
janë si sheshe, ku ti flet, por ai tjetri të përgjigjet, të gjykon. Duke reflektuar
për këtë, po mendoja si kemi kaluar nga një kulturë, në të cilën Papët ishin të paafrueshëm
– se ashtu mendohej atëherë – tek Papët e televizionit, të radios e sot, tek një Papë,
që del në shesh bashkë me të tjerët. Përveç sheshit të Shën Pjetrit, duke qenë i pranishëm
në Twitter, Benedikti XVI ndodhet njëkohësisht në çdo shesh të botës dhe i lë njerëzit
ta gjykojnë, pa pasur frikë nga kritikat. Mendoj se është një sfidë e jashtëzakonshme.