Св. Імшой распачаліся
12 снежня святкаванні 850-годдзя асвячэння сабору Нотр-Дам дэ Пары ў сталіцы Францыі.
40 біскупаў і сотні святароў прынялі ўдзел у набажэнстве, якое ўзначаліў арцыбіскуп
Парыжскі кардынал Андрэ Вэн-Труа. Упершыню пасля рэстаўрацыі загучаў Вялікі арган
храма. У адкрыцці юбілейнага году, які працягнецца да 24 лістапада 2013 г., прынялі
ўдзел французскія палітыкі, прадстаўнікі рэлігійнага і грамадскага жыцця. Юбілей адзначаецца
пад патранажам Прэзідэнта Франсуа Аланда.
На працягу года ў саборы, які з’яўляецца
самым наведвальным помнікам у Еўропе (сюды прыбывае штогод 14 млн. турыстаў), адбудуцца
розныя мерапрыемствы. Перад храмам будзе адчынены так званы “Юбілейны шлях”. Ён будзе
знаёміць з гісторыяй Нотр-Дам, яго архітэктурнай і мастацкай каштоўнасцю. У студзені
Пошта Францыі выпусціць дзве юбілейныя паштовыя маркі. Сабор ужо атрымаў новыя званы,
якія былі асвечаны ў сакавіку бягучага году перад Пальмовай нядзеляй. Акрамя таго,
у супрацоўніцтве з муніцыпалітэтам Парыжа пройдуць шматлікія канцэрты, выставы і канферэнцыі.
Будаўніцтва
Нотр-Дам пачалося ў 1163, пры Людовіку VII Французскім. Гісторыкі разыходзяцца ў меркаваннях
аб тым, хто заклаў першы камень у яго падмурак – біскуп Марыс дэ Сюлі ці папа Аляксандр
III. Галоўны алтар сабора асвяцілі ў маі 1182 г. У будаўніцтве храма прымала ўдзел
шмат розных архітэктараў, пра што сведчаць адрозныя стылем і розныя па вышыні заходні
бок і вежы. У ходзе Французскай рэвалюцыі, у канцы XVIII ст., сабор быў адабраны ў
Касцёла і абвешчаны храмам розуму. Нотр-Дам вярнуў вернікам Напалеон і ён быў рэкансэкраваны
ў 1802 г. У саборы захоўваецца адна з найвялікшых хрысціянскіх рэліквій – цярновы
вянок Езуса Хрыста.