Արամ Ա. Կաթողիկոս Ընդունեց Քրիստոնեայ-Իսլամ Երկխօսութեան Յանձնախումբի Ընդհանուր Քարտուղարը։
Երեքշաբթի, 11 դեկտեմբերի առաւօտուն, Արամ Ա. կաթողիկոս իր գրասենեակին մէջ ընդունեց
Լիբանանի Քրիստոնեայ-իսլամ երկխօսութեան յանձնախումբի ընդհանուր քարտուղարը՝ դոկտ. Մոհամետ
Սամմաք, որ միաժամանակ Արաբական երկխօսութեան յանձնախումբի անդամ է եւ Սէուտական Արաբիոյ
թագաւորին կողմէ հաստատուած՝ Վիեննայի երկխօսութեան կեդրոնի գործադիր վարչութեան քարտուղարը:
Վեհափառին հետ ունեցած իր հանդիպման ներկայ եղաւ նաեւ՝ կաթողիկոսարանի միջեկեղեցական
ու միջկրօնական յարաբերութեանց յանձնախումբի փոխատենապետ Թենի Փիրի-Սիմոնեան: Այս հանդիպումը
առիթ եղաւ ընդհանուր վերատեսութեան ենթարկելու՝ ընդհանրապէս քրիստոնեայ-իսլամ երկխօսութիւնը
եւ յատկապէս՝ Միջին Արեւելքի մէջ քրիստոնեայ-իսլամ երկխօսութիւնն ու գործակցութեան ներկայ
հանգրուանը: Արամ Ա. կարեւորութեամբ ընդգծեց քրիստոնեայ-իսլամ գործակցութիւնը վերաշեշտելու
հրամայականը` շրջանին մէջ տեղի ունեցող վերիվայրումներուն լոյսին տակ: Վեհափառ հայրապետը
ըսաւ. «Դարեր շարունակ քրիստոնեաներ ու իսլամներ գոյակցած են: Ճիշդ է, երբեմն այդ գոյակցութիւնը
զանազան պատճառներու բերումով ենթակայ դարձած է ներքին լարուածութիւններու, սակայն իբրեւ
միաստուածեան կրօններ, քրիստոնէութիւն եւ իսլամութիւն հասարակաց արժէքներ ու սկզբունքներ
ունին, որոնք հիմքը պէտք է ծառայեն ամուր գործակցութեան ու հասարակաց մօտեցումներու`
ներկայ ընկերութիւնը յուզող հարցերուն նկատմամբ»: Դոկտ. Սամմաք մեծապէս գնահատեց վեհափառ
հայրապետին եւ Մեծի Տանն Կիլիկիոյ կաթողիկոսութեան գործօն մասնակցութիւնը քրիստոնեայ-իսլամ
երկխօսութեան, թէ՛ շրջանային եւ թէ՛ միջազգային մակարդակներու վրայ: Ան ըսաւ, որ «հայ
ժողովուրդի պատմական փորձառութիւնը քրիստոնեայ-իսլամ երկխօսութեան առումով կրնայ կարեւոր
ներդրում մը բերել այս օրերուն մանաւանդ»: Դոկտ. Մոհամետ Սամմաք ապա ճաշի հիւրը եղաւ
վեհափառ հայրապետին: