Мексіканскі штат Мічаакан
падарыў Святому Пасаду дзве ёлкі і двое святочных ясляў. Яны будуць устаноўлены ў
Зале Паўла VI, дзе адбываюцца сустрэчы Бэнэдыкта ХVI з вернікамі, і ў Ватыканскіх
музеях. Пяты раз запар мексікансцы прывозяць ёлкі і яслі ў рамках ініцыятывы “Мексіканскія
традыцыі Божага Нараджэння ў Ватыкане”. Сёлета ініцыятыва прымеркавана да 20-й гадавіны
аднаўлення дыпламатычных адносін паміж Мексікай і Святым Пасадам, пасля 150-гадовага
перапынку.
Ёлкі, вышынёй каля 6 метраў, упрыгожваюць 500 круглых шароў, выкананых
уручную мексіканскімі рамеснікамі ў розных тэхніках. Круглыя, авальныя, у форме медальёна,
яны адлюстроўваюць мексіканскія мастацкія і культурныя традыцыі. У афармленні ясляў
прысутнічаюць традыцыйныя элементы адзення рэгіёна Мічаакан. Найсвяцейшая Панна Марыя
і жанчыны апрануты ў традыцыйную мантылью, тыповае адзенне жыхароў Мексікі, св. Юзэф
і мужчыны маюць на сабе кашулі і штаны з грубай тканіны, Тры Каралі апрануты ў касцюмы
выканаўцаў традыцыйных мексіканскіх танцаў.