Atë Lombardi për ipeshkvin ndihmës të Shangait: s’kemi lajme, por gjendja e klerit
është e rëndë
“Selia e Shenjtë, për momentin, nuk ka informacione të ndryshme nga ato të mediave”.
Atë Federiko Lombardi, drejtor i Sallës së Shtypit të Vatikanit, iu përgjigj kështu
pyetjeve të gazetarëve, të cilët kërkonin lajme për ipeshkvin ndihmës të Shangait,
imzot Tadeush Ma Daqin, që nuk lejohet më të kryejë detyrën e tij baritore nga autoritetet
kineze. Që prej kohësh, ai është dënuar edhe me arrest shtëpiak. Ditën e shugurimit
ipeshkvnor, më 7 korrikun e kaluar, imzot Ma Daqin dha dorëheqjen nga Shoqata patriotike,
siç quhet organizmi i ngritur nga komunistët kinezë për të kontrolluar Kishën Katolike. Atë
Lombardi sqaroi se gjendja e Kishës në Kinë mbetet e rëndë. Disa prej ipeshkvijve
dhe meshtarëve burgosen, ose mënjanohen, sapo deklarojnë se heqin dorë nga detyrat
partiake, që nuk duhet të jenë kompetenca të një bariu të grigjës së Krishtit. Si
pasojë, është rritur kontrolli ndaj personave dhe institucioneve dhe janë shtuar presionet
për t’i indoktrinuar.