Kremtimet liturgjike të Papës gjatë kohës së Krishtlindjes
Një kalendari i ngjeshur me kremtime e pret Papën Benediktin XVI në këtë periudhë
të Krishtlindjes, nga Mesha e mesnatës së Lindjes së Krishtit deri në festën e Epifanisë,
ditë në të cilën do të kremtojë disa shugurime ipeshkvnore. Po kalendari i kremtimeve
të kohës së Krishtlindjes për Atin e Shenjtë do të zgjasë deri në solemnitetin e Pagëzimit
të Jezusit, më 13 janar, ditë në të cilën do të kremtojë Pagëzimin e disa fëmijëve
në kapelën Siksitina në Vatikan. Kalendari i kremtimeve liturgjike që do të kryesohen
nga Papa Benedikti XVI u bë i njohur nga salla e shtypit vatikanase. Kremtimet papnore
do të fillojnë natën e 24 dhjetorit, kur në ora 21.00 në Bazilikën e Shën Pjetrit
në Vatikan, Ati i Shenjtë Jozef Ratcinger do të kryesojë Meshën e mesnatës së Krishtlindjes. Më
25 dhjetor, ditën e Krishtlindjes, sipas traditës, nga Sheshi i Shën Pjetrit në Vatikan
Benedikti XVI do t’i drejtojë mesazhin e urimit mbarë botës, e në ora 12.00 do të
japë bekimin apostolik “Urbi et Orbi”. Më 31 dhjetor, në ora 17.00 në bazilikën
e Shën Pjetrit do të kryesojë lutjet mbrëmësore e do të lusë uratën e falënderimit
drejtuar Hyjit ‘Te Deum’, në përfundim të vitit. Mesha e 1 janarit, në ora 9.30
në Shën Pjetër në Vatikan, Papa do të kryesojë Meshën solemne në bashkëkremtim me
Sekretarin e Shtetit të Vatikanit, kardinalin Bertone, me presidentin e Këshillit
Papnor për Drejtësi e Paqe, kardinali Peter Kodwo Appiah Trukson, me zëvendës Sekretarin
e Shtetit, imzot Giovanni Angelo Becciu, me ministrin e jashtëm, imzot Dominique Mamberti,
me sekretarin e Këshillit Papnor për Drejtësi e Paqe, imzot Mario Toso, me presidentin
e Akademisë Kishtare Papnore, imzot Beniamino Stella. Mesha e festës së Dëftimit
të Zotit, më 6 janar në ora 9.00 do të kremtohet në bazilikën e Shën Pjetrit, e gjatë
këtij kremtimi janë në program shugurimet ipeshkvnore të një grupi prelatësh që do
të bëhen nga Papa. Së fundi, më 13 janar, në Kapelën Sikstina, në 0ra 9.45 Benedikti
do të kremtojë Meshës gjatë së cilës, si famullitar i thjeshtë, do të mbarështojë
personalisht Sakramentin e Pagëzimit një grupi të fëmijëve.