Me 10 dhjetor kalendar kujton të Lumen Mari Virgjër të Loretos
Sot me 10 dhjetor kalendari Kishtar përkujton të Lumen Mari Virgjër të Loretos,
që lidhet ngushtë me Shtëpinë e Shenjtë të Nazaretit. Pra, sipas traditës në Loreto
sot kremtohet solemniteti i “Ardhjes”, në përkujtim të arritjes së Shtëpisë së Shenjtë
të Nazaretit, më 10 dhjetor 1294 pas një shtegtimi të gjatë nëpër deti nga Palestina
e deri në Loreto. Është fjala për një traditë që mbështet nga shumë prova, dokumentare
e arkeologjike. Çdo vit e përkujtojmë arritjen e gurëve të kësaj shtëpie, që ngjallin
në shpirtin e mijëra shtegtarëve, të cilët mblidhen në Loreto e në shenjtërore tjera,
mallin për një shtëpi të vërtetë, për një familje të vërtetë e të ngrohtë, plot dashuri,
për familje e shtëpi në të cilën banon vetë Zoti, i cili ndriçon familjen dhe i jep
kuptim jetës së saj. Besojmë se të gjithë shtegtarët, që sot gjunjëzohen në lutje
drejtuar Zotit përmes Zojës së Bekuar të Loretos, por edhe të gjithë besimtarët, duke
kremtuar këtë festë, ndjejnë nevojën t’i luten kështu Zotin: “Dëshiroj që edhe shtëpia
e familja ime t’i përngjasin shtëpisë e familjes së Marisë Virgjër, që edhe në gjirin
e familjes sime të hyjë një rreze e dritës Hyjnore, të asaj Drite që ndriçoi Familjen
Shenjte të Nazaretit”. Shtëpia e Nazaretit që gjendet në Shenjtëroren e Loretos
në Itali, edhe sot e kësaj dite na flet për bukurinë e Lajmit të Mirë, Ungjillit,
për pohimin e Zojës së Bekuar, që i hapi Jezu Krishtit rrugët e historisë së njerëzimit
e që na mëson edhe ne të themi “po” sa herë që Zoti na fton të ecim në shtigjet e
tij të pashqyrtueshme.