Festa e Zojës së Loretos. Papa: Maria na mëson se ku është Zoti, aty jemi në shtëpi
tonë.
Kisha kremton sot Festën e Zojës së Loretos. Me këtë rast, sot paradite, kryeipeshkvi
Giovanni Tonucci kryesoi Meshën pontifikale në Shtëpinë e Shenjtë të Loretos. Pikërisht
në shenjtëroren mariane, më 4 tetorin e kaluar, shtegtoi Benedikti XVI për t’ia besuar
Virgjërës Mari, Vitin e Fesë. Ecte mbi gjurmët e Gjonit XXIII, që e vizitoi Loreton,
50 vjet më parë, me rastin e hapjes së Koncilit II të Vatikanit. Të ndjekim disa nga
fragmentet e homelisë, mbajtur nga Papa në Loreto. Kur shtegton në Loreto, nuk
mund të mos prekesh thellë nga historia e nga pamja madhështore e shenjtërores. Zemra
e kësaj oaze mariane është një shtëpi, sipas traditës, vetë shtëpia ku jetoi Virgjëra
Mari. Pikërisht në këtë shtëpi, ku ndjehet fort fryma e jetës e të gjitha kohëve,
Benedikti XVI shqiptoi fjalë të thella, që i hapin syrit horizonte përtej gurëve të
një ndërtese: “Ku banon Zoti, duhet ta pranojmë se jemi të gjithë në shtëpi
tonë; ku banon Krishti, vëllezërit e motrat e Tij nuk janë më të huaj. Maria, Nëna
e Krishtit, e edhe Nëna jonë, na hap portën e shtëpisë së saj, na prin për të hyrë
në vullnetin e Birit të saj”. Ja, ky është mësimi më i çmuar, që mund të
nxëmë në Loreto: “Feja na bën të banojmë, të rrijmë në këtë shtëpi, por edhe të ecim
në udhët e jetës. Por shtëpia e Loretos, vëren akoma Papa, na jep edhe një mësim tjetër:
kjo shtëpi qe e vendosur në një rrugë. Mesazh i rëndësishëm, ky: “Nuk është
shtëpi private, nuk i përket një njeriu a një familjeje, por është banesë e hapur
për të gjithë, në rrugën ku kalojmë të gjithë ne. Atëherë mund të themi se këtu, në
Loreto, gjejmë një shtëpi, që na bën të rrijmë, të banojmë, e njëkohësisht, të ecim;
na kujton se jemi të gjithë shtegtarë, për udhë drejt një banese tjetër, drejt shtëpisë
së fundme, drejt Qytetit të amshuar, banesës së Hyjit me njerëzimin e shpërblyer”. Por
nuk duhet harruar kurrë se për ta hapur portën e kësaj shtëpie, për t’i hapur portat
e Zotit, duhet t’i themi ‘po’, lirisht, ashtu si bëri Maria. Zoti, pohoi Papa, kërkon
pranimin e lirë të Marisë, për t’u bërë njeri:“Sigurisht ‘po’-ja e Marisë është
fryt i hirit hyjnor. Por hiri nuk e zhduk lirinë, përkundrazi, e krijon dhe e mbështet.
Feja nuk i heq asgjë krijesës njerëzore, përkundrazi, i siguron kushtet për realizimin
e plotë e përfundimtar”.