Ватыканскі іерарх пра “канец свету”: гэта ўсё непатрэбнае хваляванне
Прэфект Кангрэгацыі
Веравучэння арцыбіскуп Герхард Людвіг Мюлер заявіў, што весці апакаліптычныя размовы,
спасылаючыся на канец календара майя, гэта безадказна і бессэнсоўна. У інтэрв’ю нямецкаму
часопісу “Focus” кіраўнік ватыканскай дыкастэрыі сказаў, што “гэта ўсё непатрэбнае
хваляванне”. Хрысціяне сёння ўвогуле не кажуць пра “канец свету”. Турбота пра будучыню
несумяшчальная з хрысціянскай верай. На 21 снежня, прызнаўся арцыбіскуп, у яго запланаваныя
сустрэчы і мерапрыемствы. “Але, можа быць так, што ў наступную секунду я павінен буду
прадстаць перад Богам”, - дадаў ён.
Як асабістае пажаданне на святы Божага
Нараджэння прэфект Кангрэгацыі Веравучэння запрасіў усіх “больш трымацца разам, радавацца
быццём людзьмі і аптымістычна і энергічна глядзець і ісці ў будучыню”. На Божае Нараджэнне
людзі павінны не толькі звяртацца да сваіх настальгічна-дзіцячых эмоцый, але на самой
справе стаць лепшымі і больш прыязнымі, лічыць арцыбіскуп Мюлер.