«Սուրիական Իշխանութիւններու Կողմէ Քիմիական Զէնքերու Օգտագործման Հաւանականութեան Նկատմամբ
Մտահոգ Ենք» Կ՝ըսէ Պան Քի Մուն ։
Պան Քի Մուն Պաղտատի մէջ Իրաքի վարչապետ Նուրի Մալիքիի հետ տրուած միացեալ մամլոյ ասուլիսի
մը ընթացքին սուրիական վարչակարգը զգուշացուց այդ քայլին դիմելէ` յայտնելով, որ այդ պարագային
անիկա դատական հետապնդումի պիտի ենթարկուի: Պան Քի Մուն չորեքշաբթի օր Սուրիոյ նախագահ
Պաշշար Ասատի նամակ մը յղելով յայտնած էր, որ քիմիական զէնքեր օգտագործելը «պիտի ըլլայ
բացայայտ ոճիր մը, որ քանդիչ հետեւանքներ պիտի ունենայ՝՝ ։ Ան ամիսներ առաջ նոյն բովանդակութեամբ
այլ նամակ մը յղած էր: Ամերիկեան «Էն.Պի.Սի.» պատկերասփիւռի կայանը հաղորդեց, որ սուրիական
վարչակարգը օդուժի կողմէ արձակուելիք հրթիռները օժտած է ջիղերուն ազդող մահաբեր կազով: Ամերիկացի
պաշտօնատարներ պատկերասփիւռի կայանին յայտնած են, որ սուրիական բանակը այդ հրթիռներով
ընդդիմադիրներու կեդրոնները հարուածելու համար նախագահ Ասատի վերջնական հրամանին կը սպասէ: Մինչ
այդ, Գերմանիոյ կառավարութիւնը համաձայն գտնուեցաւ «Փաթրիոթ» տիպի հրթիռներ եւ զինուորներ
Թուրքիա ուղարկելու առնչութեամբ։ : Իսկ Սուրիոյ արտաքին գործոց փոխնախարար Ֆայսալ
Մըքտատ յայտնեց, որ «սուրիական իշխանութիւնները պիտի չդիմեն այդ քայլին, եւ չենք կրնար
քիմիական զէնքերը քաղաքայիններուն դէմ օգտագործել, նոյնիսկ եթէ Սուրիա այդ զէնքերը ունի»: Երէկ
ականի մը պայթումը ցնցեց Դամասկոսի մէջ Կարմիր Մահիկի կեդրոնատեղին: Դամասկոսի Ղութա
Շարքիա շրջանին մէջ կառավարական ուժերու եւ զինեալ ընդդիմութեան միջեւ բուռն բախումներ
տեղի ունեցան: Բանակը դադրեցուց շրջանին մէջ օդուժի օգտագործումը: