EgittoՆախագահ Մուրսի Քաղաքական Բոլոր Կողմերը Հրաւիրեց Երկխօսութեան ։ Բայց Եւ Այնպէս
Ցոյցերը Չեն Դադրիր։
Եգիպտոսի նախագահ Մոհամետ Մուրսի երէկ գիշեր ժողովուրդին յղեց պատկերասփռուած ուղերձ
մը, որուն մէջ յայտնեց, որ պէտք է բոլորս յարգենք ժողովուրդին կամքը, զոր զայրացած հաւաքներն
ու բռնարարքները չեն արտայայտեր… երբեք պիտի չարտօնեմ, որ մէկը սպանութեան կամ խափանարարութեան
ճամբով քաղաքացիները ահաբեկէ»: Ան ըսաւ, որ բողոքի ցոյցերուն ընթացքին զէնք օգտագործողներէն
ոմանք վարձկաններ են եւ կապեր ունին քաղաքական ուժերու հետ` աւելցնելով, որ զանոնք ֆինանսաւորողները,
ըլլան անոնք ներքին կամ արտասահմանէն, հաշուետուութեան պիտի կանչուին: Ան նշեց, որ «վերջին
իրադարձութիւնները ցոյց տուին, որ սահմանադրական փաստաթուղթը յայտարարելուս պատճառները
եւ պայմանները ի զօրու են… ժողովուրդին նկատմամբ իմ պարտաւորութիւնս զիս մղեց սահմանադրական
փաստաթուղթը յայտարարելու եւ այդ պարտաւորութիւնը միշտ պիտի կատարեմ, ինչ որ ալ ըլլան
ճնշումները»: Նախագահ Մուրսի բոլոր կողմերը շաբաթ օր ժամը 12:30-ին հրաւիրեց նախագահական
պալատին մէջ երկխօսութեան: «Եթէ հանրաքուէի ժամանակ ժողովուրդը սահմանադրութեան նախագիծը
մերժէ, կոչ պիտի ուղղեմ սահմանադրութեան բանաձեւման նշանակովի կամ ընտրովի նոր Մարմինի
մը կազմութեան» ըսաւ նախագահ Մուրսի: Եգիպտական բանակը երէկ առաւօտեան Գահիրէի մէջ
նախագահական պալատին շուրջ հրասայլեր, զրահապատ մեքենաներ տեղակայեց եւ փշաթելերով եւ
պողպատեայ արգելքներով փակեց նախագահական պալատ տանող ճամբան: Նախագահական պահակագունդի
հրամանատարը յայտնեց, որ ուժերը տեղակայուած են նախագահ Մոհամետ Մուրսիի համակիրներն
ու ընդդիմադիրները իրարմէ անջատելու համար: Իսկ Իսլամ եղբայրները չեղեալ յայտարարեցին
այսօր Գահիրէի, Աղեքսանդրիոյ եւ Ասիութի մէջ նախատեսուած «Առ ի զօրակցութիւն իսլամական
օրէնքի» նշանաբանին տակ տեղի ունենալիք հանրահաւաքները: