Çelësi i fjalëve të Kishës: Besojma e krishterë, pjesa e fundit
Të dashur dëgjues, sot do të reflektojmë mbi pjesën e fundit të “Besojmës” së krishterë,
pasi kemi folur, në emisionet e kaluara, mbi kuptimin e këtij simboli të fesë, me
të cilin shpallim para botës se në çfarë besojnë të krishterët. Pasi përmendëm Shpirtin
Shenjt, thuhet se të krishterët besojnë:
Edhe në një Kishë të
vetme, të shenjtë, katolike dhe apostolike.
A duhet besuar në Kishën?
Nuk është një besim si ai për Trininë Shenjte, por Kishën e ka dashur vetë Jezusi,
për t’ia bërë të njohur botës gjithçka ka sjellë në Tokë nga Trinia e Shenjtë vetë
Krishti. Prandaj, është e drejtë të besojmë në mësimet e Kishës për Zotin. Mund të
themi: kam besim se mësimet e Kishës janë të vërteta. Por për ç’Kishë është fjala?
Kisha e Krishtit nuk është famullia, as prifti e madje, as Vatikani. Të gjitha këto
bëjnë pjesë në Kishë, por Kisha vetë është më shumë se kaq. Nëse përdorim fjalët e
Biblës, në Librin e Zbulesës e në Letrën për Efezianët, Kisha është NUSJA e Jezusit.
E duam këtë Kishë, sepse është Nëna jonë shpirtërore, na ka bërë të rilindim në fe;
e duam, sepse pranon në gjirin e vet shenjtorë e mëkatarë, të gjallë e të vdekur,
miliarda njerëz; e duam edhe për meshtarët e murgeshat, që mohojnë vetveten, për të
dashur një familje tjetër, së cilës ia dhurojnë jetën: bashkësinë e krishterë. Kjo
Kishë është “një”, pasi pavarësisht se e ndarë në katolikë, ortodoksë, protestantë…
është e VETMJA Nuse e Krishtit. Është “e shenjtë”, pasi merr gjithçka nga Jezusi,
pavarësisht se nganjëherë mëkaton. Por është më tepër e shenjtë, ashtu siç mund të
jetë gjithnjë “i mirë” prindi, pavarësisht nga gabimet, pasi ka për bijtë një dashuri
pafundësisht më të madhe se çdo kufizim të tij. Kjo Kishë është edhe “katolike”, që
do të thotë universale. Ajo përmbledh krejt njerëzimin, është dërguar për t’u shpallur
Lajmin e Mirë të gjithë njerëzve, të gjithë botës, gjatë gjithë historisë. Është “apostolike”,
pra, e themeluar nga apostujt. Jo më kot Papa quhet Pasardhës i Shën Pjetrit, i gurit
të këndit mbi të cilin Krishti ndërtoi Kishën e vet. “Besojma” vazhdon:
Dëshmoj
një Pagëzim të vetëm për faljen e mëkateve
Hyjmë në Kishën-Nuse-të-Krishtit
përmes Pagëzimit, i cili është Sakrament, që merret vetëm një herë në jetë. Këtë e
kanë parasysh edhe protestantët e ortodoksët, të cilët nuk i pagëzojnë rishtas ata
katolikë, që bashkohen me ta, në ndryshim nga Dëshmitarët e Jehovait, të cilët ripagëzohen,
duke harruar se ky Sakrament është një i vetëm e na bën një me Krishtin. Me anë të
Pagëzimit shlyejmë mëkatin e rrjedhshëm të Adamit e të Evës, atë që s’varet nga ne,
që jetojmë sot, në këtë kohë. Por për mëkatet që varen nga ne, të mos harrojmë se
kemi nevojë për Pendimin e Rrëfimin, Sakramente të domosdoshme për ta pastruar e shndritur
shpirtin.
Pres ngjalljen e të vdekurve, vazhdon “Besojma”.
Ne
besojmë në një TË VËRTETË tjetër tejet të rëndësishme: besojmë se jeta nuk mbaron
me vdekjen. Njësoj si Jezusi, edhe ne jemi të destinuar për Ringjalljen jo vetëm të
shpirtit, por edhe të trupit. E si ka mundësi, si do të jetë kjo ringjallje? – do
të pyesë ndokush. Nuk është e vërtetë se nuk e dimë, do të jetë siç ishte për Jezusin,
i cili u paraqit me një trup, që nuk zinte vend as në hapësirë e as në kohë. Duke
hyrë në Çenakull – për të përdorur një imazh mjaft popullor – Jezusi kaloi përmes
mureve e për Të koha nuk kalon, pasi ka të njëjtin Korp tani, si atëherë, nuk plaket. Shën
Pali, në kapitullin e 15-të të Letrës së parë drejtuar Korintasve, përdor një similitudë:
atë të kokrrës së grurit, që nëse e mbjell, vdes për t’i dhënë jetë një bime të re,
e cila është gjithnjë grurë, por ka diçka më shumë, më të bukur, më të pasur… Kështu
do të jetë edhe ringjallja për ne. Është jetë e re, apo siç thotë “Besojma”:
jetë e pasosur.
Sipas Biblës, na presin “Qiej të
rinj e tokë e re”. Ja fjalët e Librit të Zbulesës, kapitulli i 21-të: “Pashë një
qiell të ri e një tokë të re, sepse qielli i parë dhe toka e parë u zhdukën, as deti
nuk është më. Pashë edhe qytetin e shenjtë - Jerusalemin e ri: zbriste nga qielli,
prej Hyjit, i stolisur porsi nusja e përgatitur për fatin e vet. Atëherë dëgjova një
zë të fortë që vinte nga froni: »Ja Tenda e Hyjit me njerëz! Hyji do të banojë me
njerëz! Ata do të jenë populli i tij, kurse Ati, vetë Hyji, do të jetë me ta [Hyji
i tyre]«. Ai do të fshijë çdo lot nga sytë e tyre. As Vdekja më s’do të jetë, as vaj,
as ofshamë, as dhimbje më s’do të ketë, [sepse] bota e mëparshme mori fund. Atëherë
Ai që rri mbi fron tha: »Ja, unë i bëj të reja të gjitha gjërat!«”. Kjo është
bota, që do të vijë. Aty ku mendojmë se gjithçka mbaron, GJITHÇKA FILLON.