Kongo: situatë e rëndë në Goma. Kardinali Maradiaga: lufta bëhet për burimet minerale
Situata humanitare në Kivu, në Lindje të Republikës Demokratike të Kongos, vazhdon
të jetë dramatike. Në Kampala, në Ugandë, pritet të nisin negociatat ndërmjet qeverisë
kongoleze e rebelëve M23. Në Goma, pas daljes së rebelëve, vazhdon të mbizotërojë
dhunë e plaçkitje. Papa, dje, gjatë audiencës së përgjithshme në Vatikan, bëri thirrje
për rivendosjen e paqes e për të ndihmuar dhjetëra mijëra civilë që kanë braktisur
shtëpitë e tyre, për t’i shpëtuar dhunës e konfliktit. Karitasi Ndërkombëtar është
duke koordinuar ndihmat e Kishës katolike për popullsinë civile, siç pohon kardinali
Oscar Andrés Rodréguez Maradiaga: “Më duket që fjalët e Papës janë vërtetë
shumë të rëndësishme, sepse është ai autoriteti i vetëm moral, që ka mbetur në botë
e që ka mundësinë të arrijë tek të gjithë njerëzit vullnet mirë. Kjo thirrje e Atit
të Shenjtë Benediktit XVI duhet të çmohet shumë e të shqyrtohet, sepse nuk është e
mundur të asistojmë para një lufte të re për arsye që mund të evitohen: njëra prej
shkaqeve kryesore është interesi për mineralet e çmueshme, që janë strategjike e që
janë baza e luftës që shpërtheu nga lëvizjet e armatosura, nga guerilja. Prandaj,
nuk ka shkaqe ideologjike: synimi është vetëm pushtimi i atyre territoreve për shfrytëzimin
mineraleve të çmueshme. Unë i bëjë jehonë thirrjes së Papës, që në mbarë botën katolike
të ndërmerret nisma, posaçërisht vargu i lutjes, që Shpirti Shenjtë Zot të mund t’i
shndërrojë zemrat dhe të bënë në mënyrë që ndjenjat e lakmisë e të dëshirës vetëm
materiale të mund të shndërrohen në respektim të jetës, posaçërisht të më të varfërve”.