வேலை செய்யும் கட்டாயத்திற்குள்ளாகும் சிறார்களின் எண்ணிக்கை குறையவில்லை

டிச.05,2012. உலகெங்கும் 20 கோடிக்கும் மேற்பட்ட சிறுவர் சிறுமியர் கட்டாயமாக வேலை செய்ய நிர்ப்பந்திக்கப்படுகிறார்கள் என்று சிறார் தொழில் செய்வது குறித்து ஐ.நா.அவை வெளியிட்டுள்ள புதிய அறிக்கை ஒன்று கூறுகிறது.
இவர்களில் சுமார் ஒன்றரை கோடி சிறார்கள் எந்த ஒரு பள்ளிக் கல்வியும் கிடைக்கப் பெறாமலே இருக்கிறார்கள் என்றும் இவ்வறிக்கை கூறுகிறது.
இதுபோல சிறார்கள் வேலை வாங்கப்படுவது குறைந்து வரும் விகிதம் மிகவும் மந்தமாகவே இருப்பதாகவும், உலக அளவில் கல்வியை மேம்படுத்த எடுக்கப்பட்டுவரும் முயற்சிகளை இது குலைப்பதாகவும், கல்விக்கான ஐ.நா.அவை சிறப்புத் தூதர் அலுவலகத்தால் வெளியிடப்பட்ட இந்த அறிக்கை கூறுகிறது.
ஆப்ரிக்காவில் வேலை செய்யும் கட்டாயத்திற்குள்ளாகும் சிறார்களின் எண்ணிக்கை 2020ம் ஆண்டையொட்டி, மேலும் 1.6 கோடியாக அதிகரிக்கும் என்று ஒரு கணிப்பு கூறுகிறது.