NATO-ja miraton vendosjen e raketave kundër Sirisë, në Turqi
Kriza siriane shkakton reagimin e NATO-s. Para kërcënimit për përdorimin e mundshëm
të armëve kimike, pavarësisht nga përgënjeshtrimet e presidentit sirian al Asad, Pakti
i Atlantikut autorizoi vendosjen e raketave Patriot në Turqi, përgjatë kufirit me
Sirinë. Kërkesa u bë nga qeveria e Ankarasë, e cila sqaroi se do të përdoren vetëm
në rast sulmi nga ana e Damaskut. Ndërkaq, në terren vazhdon gjakderdhja. Në një
ditë, mëse 120 viktima; u bombardua nga opozita edhe një shkollë në kampin e refugjatëve
në verilindje të kryeqytetit sirian, duke shkaktuar vdekjen e 28 fëmijëve. Të dëgjojmë
komentin e drejtorit të Revistës Italiane për Mbrojtjen, Pjetro Bataki: Që
Siria ka armë kimike, është jashtë çdo dyshimi. Është e qartë tashmë. Programi lindi
në fund të viteve ’70, fillimi i viteve ’80, kur i ati i presidentit aktual Bashar
al-Asad, i cili quhej Hafiz al-Asad, e kuptoi se lëndët kimike mund të ishin përgjigjja
më e mirë e regjimit ndaj programit bërthamor izraelit, për shkak të kostos së ulët.
Para disa vjetësh, Siria pati filluar edhe një program bërthamor, të cilit i dhanë
fund bombardimet izraelite kundër reaktorit të al-Kibarit, në shtator 2007. Sipas
lajmeve të fundit, armët kimike po zhvendosen brenda territorit. A janë akoma efikase? Gjendja
e programit kimik sirian nuk është e qartë. Disa përbërës të armëve kimike, mund të
kenë skaduar pas kaq vitesh, por nuk e dimë nëse programi ka sot, të njëjtin efikasitet
si 10, apo 15 vjet më parë. Sipas jush, çfarë e mban akoma gjallë regjimin
sirian? Regjimi i Asadit mbijeton për hir të një dinamike të jashtme. Derisa
Rusia ta mbështesë, kam përshtypjen se ky regjim do të vazhdojë të jetojë, pasi është
në lojë qëndrueshmëria e krejt zonës. Siria është një vend më i ndërlikuar se Libia.
Në Libi, në vitin 2011, bashkësia ndërkombëtare, NATO-ja, OKB-ja, ndërhynë, sepse
Rusia ua lejoi këtë. Sot për sot, të ndërhysh në Siri, do të thotë të ngacmosh edhe
Iranin, Izraelin, Turqinë… do të thotë të prekësh vetë zemrën e Lindjes së Mesme.
Kjo është arsyeja që bashkësia ndërkombëtare heziton të hyjë në një konflikt, përfundimi
i të cilit nuk mund të llogaritet e të parashikohet lehtë.