Եգիպտոսի Գերագոյն Դատարանը ՝՝Իբրեւ Բողոք՝՝ Կը Դադրեցնէ Իր Աշխատանքերը։
Եգիպտոսի Գերագոյն դատարանը երէկ յայտարարեց, որ իր դիմագրաւած «հոգեբանական ճնշում»-ին
դէմ իբրեւ բողոք անորոշ թուականով կը դադրեցնէ իր բոլոր աշխատանքները: Իսլամական ցուցարարներ
երէկ արգելք հանդիսացան, որ դատաւորները սահմանադրութեան նոր բանաձեւին շուրջ վճիռ արձակելու
համար ժողով մը գումարեն: Նախագահ Մոհամետ Մուրսիի համակիրները կ՛ուզէին արգելք հանդիսանալ
որեւէ վճիռի, որ հարցականի տակ կ՛առնէր Մուրսիի հրապարակած փաստաթուղթին օրինականութիւնը:
Դատարանը երէկ յայտարարեց, որ կիրակի օր «եգիպտական արդարադատութեան պատմութեան մէջ ամէնէն
սեւ օրն էր»: Երէկուան զարգացումները մէկ կողմէ նախագահ Մուրսիի եւ իր իսլամական համակիրներուն,
իսկ միւս կողմէ աշխարհիկ քաղաքական ընդդիմութեան եւ արդարադատութեան միջեւ ճակատումին
մէկ արարն էր: Մուրսի 22 նոյեմբերին իր հրապարակած հրամանագիրով համապարփակ լիազօրութիւններ
ստանձնեց եւ արդարադատութիւնը զրկեց իր որոշումները վիճարկելու որեւէ իշխանութենէ, ուստի
յստակ չէ, թէ Գերագոյն դատարանի վճիռը շօշափելի ի՛նչ արդիւնքի պիտի յանգէր: Բայց եւ այնպէս,
վերլուծաբաններ կը յայտնեն, որ անոր հրամանագիրին դէմ որեւէ վճիռ ուղղակի մարտահրաւէր
մը պիտի ըլլար եւ այդ հրամանագիրը չեղեալ նկատելու ընդդիմութեան արշաւը պիտի քաջալերէր: Մուրսի
յայտարարեց, որ 15 դեկտեմբերին սահմանադրութեան նախագիծին շուրջ հանրաքուէ տեղի պիտի
ունենայ, եւ «բոլոր եգիպտացիներուն» կոչ ուղղեց հանրաքուէին մասնակցելու: Բայց ընդդիմադիրները
կ՛ըսեն, թէ նշեալ նախագիծը հիմնական ազատութիւնները կ՛ոտնակոխէ: Հուսկ Շաբաթ օր իսլամականները
Գահիրէի մէջ հաւաք մը կատարեցին` բացագանչելով. «Ժողովուրդը նախագահին որոշումին կը զօրակցի»:
Մինչ այդ, բազմաթիւ ընդդիմադիրներ սակայն կը շարունակեն Գահիրէի ՝՝Թահրիր՝՝ հրապարակին
վրայ իրենց յայտարարած բաց նստացոյցը: