Më 3 dhjetor kalendari përkujton shën Françesk Saverin, jezuit
Sot kalendari i Kishës katolike përkujton Shën Françesk Saverin, rregulltar jezuit,
Apostull i Indisë, Pajtor i Misioneve. Shenjti njihet edhe si pajtor i udhëtarëve
dhe i turistëve, sepse gjatë jetës së tij përshkoi më se njëqind mijë kilometra. Por
kryesisht është njëri nga jezuitët e parë në historinë e Urdhrit të mirënjohur, sepse
përkrah me Injacin e Lojolës, themeloi më 1534 Shoqërinë e Jezuitëve. Nga qyteti
i Navarrës, ku kishte lindur më 1506, në moshë të pjekur u nis për rrugë të largëta.
Predikoi Ungjillin e Krishtit në Indonezi e në Japoni. Ëndrra e tij ishte ta vijonte
këtë predikim edhe në Kinë, ku nuk mundi të arrinte: vdiq fare pranë brigjeve të dëshiruara,
në një ishull në afërsi të Kantonit, më 3 dhjetor 1552. Për jetën e Shenjtit janë
shkruar dhjetëra libra. Figura e tij është e mirënjohur edhe në Shqipëri, sepse emri
i Shenjtit ka qenë i gjithpranishëm në jetën e besimtarëve katolikë e të shumë shqiptarëve
të besimeve të tjera. Mjafton të kujtojmë se këtë emër mbante një nga shkollat më
të famshme në Shqipërinë e para diktaturës: Shkolla Saveriane në Shkodër (sot shkolla
e mesme Atë Pjetër Meshkalla) nën drejtimin e Jezuitëve. Ndër librat më të njohur
mbi jetën e veprimtarinë e këtij shenjti të jashtëzakonshëm vepra e jezuitit shqiptar
atë Anton Xanonit “Jeta e Shen Françesk Saverit” ose “Apostulli i Hindit (biografi),
botuar në vitin 1916. Një tjetër vepër kushtuar jetës së shenjtit në gjuhën shqipe
është ajo me titullin: "Shën Françesk Saveri" shkruar nga kryeipeshkvi
i ndjerë i Shkodrës, Imzot Fran Illia.