Бэнэдыкт ХVI да студэнтаў: абвяшчайце Бога ва ўніверсітэцкіх залах
“Літургія, перажываная
ў яе сапраўдным духу заўсёды з’яўляецца сапраўднай школай хрысціянскага жыцця, “тэалагічнай”
верай, якая ахоплівае ў сябе ўсю вашу істоту: душу, дух і цела, каб зрабіць вас “жывымі
камянямі ў пабудове Касцёла і супрацоўнікамі новай евангелізацыі”, - з такімі словамі
звярнуўся Бэнэдыкт ХVI да студэнтаў рымскіх універсітэтаў. Святы Айцец 1 снежня, у
другой палове дня, узначаліў Нешпары з нагоды пачатку Адвенту, якія далі пачатак новаму
літургічнаму году. У сваёй гаміліі Пантыфік указаў студэнтам шлях веры, які яны павінны
прайсці падчас Года веры. “Цэлебруючы і перажываючы разам з Касцёлам гэты шлях веры,
вы зазнаеце досвед таго, што Езус з’яўляецца адзіным Панам космасу і гісторыі, без
Якога кожная чалавечая пабудова падвяргаецца рызыцы знікнення”, - сказаў Папа. Ён
адзначыў, што ў Эўхарыстыі жывы Бог знаходзіцца вельмі блізка нас, даючы нам ежу,
якая падтрымлівае гэтым шлях. “Але мы жывём у кантэксце, у якім часта сустракаемся
з абыякавасцю да Бога. Але думаю, што нават у тых людзях, якія жывуць далёка ад Бога,
існуе глыбокае ўнутранае імкненне да бясконцага, да трансцэндэнтнага”, - сказаў Святы
Айцец.
На думку Бэнэдыкта ХVI таксама і ўніверсітэцкія залы з’яўляюцца месцамі
абвяшчэння Бога, пошуку праўды. Папа нагадаў, што падчас вучобы студэнты не толькі
набываюць веды, але гэта таксама час духоўнай і чалавечай фармацыі. Ён заклікаў акадэміцкую
супольнасць Вечнага Горада паразважаць над сэнсам веры. “Вера гэта дзьверы, якія Бог
адкрывае ў нашым жыцці, каб весці нас да сустрэчы з Езусам”, - адзначыў Пантыфік.
Ён дадаў, што хрысціянская вера гэта вызнаванне не будзь-якога і неакрэсленага бога,
але жывога Бога, які ў Езусе Хрысце, Уцелаўлёным Слове ўвайшоў ў нашу гісторыю і аб’явіўся
як Адкупіцель чалавека. “Верыць значыць даручыць уласнае жыццё Таму, які можа даць
гэтаму жыццю паўнату і адкрыць яго на надзею, якая выходзіць за межы часу”, - сказаў
Папа да студэнтаў рымскіх універсітэтаў.
На заканчэнне літургіі моладзь Рыму
перадала сваім аднагодкам з Бразіліі ікону Маці Божай “Sedes Sapientiae” (Сталіцы
Мудрасці), якая на працягу апошніх месяцаў пілігрымавала па рымскіх універсітэтах.
Ікона цяпер будзе знаходзіцца ў горадзе Бела Арызонтэ, у якім ў ліпені 2013 г.адбудзецца
Сусветная сустрэча універсітэцкай моладзі.