Святы Пасад з задавальненнем прыняў рашэнне ААН па прызнанні статусу Палестыны
Ватыкан з радасцю
прыняў рашэнне Генеральнай Асамблеі ААН, якая 29 лістапада прызнала за Палестынай
статус “дзяржавы-назіральніка” пры сваіх ўстановах. “Гэта вельмі важнае рашэнне, якое
спрыяе канчатковаму вырашэнню напружання паміж ізраільцянамі і палестынцамі. Мір
патрабуе смелых рашэнняў”, - адзначыў Святы Пасад у сваім спецыяльным паведамленні.
У ім падкрэсліваецца, што гэта рашэнне з’яўляецца адлюстраваннем волі большасці членаў
міжнароднай супольнасці, але яно не “з’яўляецца само па сабе дастатковым у вырашэнні
існуючых праблем у рэгіёне”. “Іх можна будзе вырашыць адпаведным чынам толькі шляхам
эфектыўнага спрыяння пабудове міру”, “у справядлівасці і павазе да законных імкненняў
як ізраільцян, так і палестынцаў”, - удакладняецца ў паведамленні Апостальскай Сталіцы.
Святы
Пасад нагадаў аб Рэзалюцыі ААН з 1947 г. , якая заклала законныя асновы для існавання
двух дзяржаў: Ізраіля і Палестыны. Аднак апошняй да гэтага часу не існуе. У паведамленні
ўзгадваецца заклік Бэнэдыкта ХVI ад 15 мая 2009 г. падчас знаходжання Пантыфіка ў
Святой Зямлі, да спынення кровапраліцця, тэрарызму і ваенных дзеянняў.
У паведамленні
гаворыцца, што Святы Пасад неаднойчы заклікаў лідэраў абодвух краін пачаць перамовы
ў духу добрай волі і пазбягаць такіх дзеянняў, якія супярэчаць добрай волі і шчыраму
шуканню рашэнняў, як фундаменту трывала міру.