Presidentja e Kuvendi i Kosovës pritën Ramush Haradinaj
Presidentja e Kosovës, zonja Atifete Jahjaga, priti sot në takim ish-kryeministrin
dhe kryetarin e AAK-së, Ramush Haradinajn, me bashkëpunëtorët e tij. Presidentja
Jahjaga i uroi mirëseardhje z. Haradinaj dhe e uroi për lirimin e shpalljen të pafajshëm
për të gjitha akuzat nga Gjykata Ndërkombëtare për Krime Lufte në Hagë. Ajo tha se
ky është një gëzim jo vetëm për familjen e tij por edhe për të gjithë qytetarët e
Kosovës, sepse kauza për të cilën ka luftuar Haradinaj dhe angazhimi i tij mbetet
e pastër dhe kontributi i tij për shoqërinë dhe për Kosovën, ashtu si edhe në të kaluarën,
do të jetë domethënës. Presidentja Jahjaga theksoi se Kosova ka bërë hapa të rëndësishëm
në proceset demokratike por tha se si çdo shtet tjetër në tranzicion po bëhen përpjekje
që duke respektuar ligjin dhe Kushtetutën të realizohen synimet. Kryetari i AAK-së,
Ramush Haradinaj, e falënderoi presidenten Jahjaga për pritjen dhe për mbështetjen
që i ka ofruar. Ai e vlerësoi gjithashtu gjithë pritjen që i është bërë në Kosovë
pas lirimit nga Gjykata dhe tha se ka përcjellë me vëmendje gjithë proceset nëpër
të cilat po kalon vendi. Edhe Kryetari i Kuvendit të Kosovës,. Jakup Krasniqi,
i ka rezervuar sot një takim kryetarit të Aleancës për Ardhmërinë e Kosovës (AAK),
Ramush Haradinaj, i cili dje u shpall i pafajshëm nga Gjykata Ndërkombëtare e Hagës
dhe u lirua nga paraburgimi. Kryesia e Kuvendit të Kosovës, në një takim të drejtuar
nga dr.Jakup Krasniqi, në të cilin merrnin pjesë edhe shefat e grupeve parlamentare,
ka shqyrtuar kërkesën e Grupit Parlamentar të AAK-së për Seancë solemne me rastin
e lirimit nga Gjykata e Hagës të ish kryeministrit të Kosovës, z. Ramush Haradinaj. Duke
e vlerësuar lart kontributin e z. Ramush Haradinaj për çlirimin e Kosovës, angazhimet
politike të tij, pas çlirimit të Kosovës dhe sjelljen e tij përballë drejtësisë, anëtarët
e Kryesisë dhe shefat e grupeve parlamentare, të pranishëm në takim, njëzëri kanë
vendosur që sot, më 30.11.2012, në orën 14:00, Kuvendi i Republikës së Kosovës të
mbajë Seancë solemne me rastin e lirimit të z. Haradinaj.