Սուրիոյ Մէջ Բռնութիւնը Առանց Դադարի։ «Ռուսիա Սուրիական Հարցերուն Արտաքին Միջամտութեան
Դէմ Է Եւ Սուրիոյ Մէջ Զինեալ Տագնապին Մասնակցելու Մտադրութիւն Չունի» Կ՝ըսէ Սերկէյ
Լաւրով:
Հայ Զոհ Մը՝Դամասկոսի Ժարամանա Շրջանի Պայթումներու Պատճառով։
Ռուսիոյ
արտաքին գործոց նախարար Սերկէյ Լաւրով ռուսական «Արկումենթի է ֆաքթի» օրաթերթին հետ ունեցած
հարցազրոյցի մը ընթացքին յայտնեց, որ «Ռուսիա սուրիական հարցերուն արտաքին միջամտութեան
դէմ է եւ Սուրիոյ մէջ զինեալ տագնապին մասնակցելու մտադրութիւն չունի»` նշելով, որ «Ռուսիոյ
եւ Սուրիոյ միջեւ զինուորական թեքնիք գործակցութեան նպատակը Միջին Արեւելքի մէջ կայունութեան
պահպանումն է եւ երբէք անոր նպատակը սուրիական ներքին բեմին վրայ որեւէ ուժի աջակցիլ
եղած է»: Ան ըսաւ, որ Ռուսիա իր կարելին կ՛ընէ Սուրիոյ մէջ արիւնահեղութիւնը դադրեցնելու
եւ հակամարտող կողմերը բանակցութեան սեղան նստեցնելու համար, որպէսզի անոնք երկրին ապագայ
քաղաքական վարչակարգին ուրուագիծին շուրջ համաձայնութիւն գոյացնեն: Իսկ 28 Նոյեմբերի
երեկոյեան Դամասկոսի մէջ երկու պայթումներ խանգարեցին մայրաքաղաքի արուարձաններէն Ժարամանա
շրջանին առօրեան. Երկու ականուած ինքնաշարժներ իրերայաջորդ կերպով պայթեցան շրջանի կեդրոնական
հրապարակին վրայ` պատճառելով ծանր վնասներ շուրջի շէնքերուն եւ ինքնաշարժներուն: Մեռեալներու
թիւը հասած է 54-ի,իսկ վիրաւորներունը 120-ի։ Աւելի ուշ պարզուեցաւ, որ զոհերուն
մէջ կայ Հայաստանի քաղաքացիութիւն ստացած մէկ հայ կաթողիկէ` Ֆատի ՊՈԼՕ: Ժարամանա շրջանին
մէջ բնակութիւն հաստատած են մօտ 400 հայ ընտանիքներ: