Çelësi i fjalëve të Kishës: Besojma e krishterë, pjesa e gjashtë
Të dashur dëgjues, në emisionin e 167-të të rubrikës sonë, vazhdojmë të flasim për
“Besojmën e krishterë”. Kemi arritur tashmë drejt fundit të këtij simboli, pikërisht
në pjesën kur pohojmë fenë tonë në Vetjen e tretë të Trinisë Shenjte. Themi:
Besoj edhe në Shpirtin Shenjt, që është Zot dhe jetëbërës
Shpirti
i Shenjtë, Fryma hyjnore, duket kaq i panjohur, por në të vërtetë, e përmendim çdo
ditë, mjafton të bëjmë shenjën e kryqit. Ai quhet “banori i ëmbël i shpirtit”, “gishti
i së Djathtës së Atit”. Në Letrën e parë të shën Palit drejtuar Korintasve, apostulli
sqaron: “kush prej njerëzve di çka është në njeri përveç shpirtit të njeriut që
është në të?” (2,11), e më tej: “askush nuk mund të thotë as: “Jezusi është
Zot!”, veçse nën veprimin e Shpirtit Shenjt” (12,3). Është vetë Zoti, Ai që na
ka dikuar në zemra Shpirtin e Birit të vet, i cili e thërret “Abba, Atë!”. Edhe Shpirti
i Hyjit është Zot, si Jezusi, si Ati Qiellor. Janë tri Vetje të barabarta, që duke
qenë një, dallohen nga njëri-tjetri. Besojma thotë se Shpirti i Shenjtë është edhe
“jetëbërës”, pra jep jetën, e krijon atë së bashku me Atin dhe me Birin. Madje, vazhdohet
Që rrjedh prej Atit dhe prej Birit
Besojma na thotë
“rrjedh”, ndërkohë që për Jezu Krishtin, përdor fjalën “i lindur” prej Atit. Janë
të dyja, fjalë që na tregojnë se Ati, Biri e Shpirti i Shenjtë janë një Zoti i vetëm,
Tri Vetje të barabarta e të dallueshme.
Dhe së bashku me Atin
dhe Birin, adhurohet dhe lavdërohet
Trinia e Shenjtë është një dhe
e pandashme. Kur flasim për veprimin e njërës prej Vetjeve, duhet të kemi parasysh
se është në bashkim me dy Vetjet e tjera. Dikush, për të na e shpjeguar pak më qartë
këtë koncept të vështirë, ka përdorur një imazh jo të përsosur, por gjithsesi, të
qartë: trekëndëshin barazbrinjësh, në të cilin të tria këndet dhe të tria brinjët
janë të barabarta ndërmjet tyre, por dallohen mirë nga njëri-tjetri. E ashtu si Trekëndëshi
nuk mund të jetë i tillë pa një kënd, apo pa një brinjë, edhe Trinia e Shenjtë nuk
mund të kuptohet pa njërën prej Vetjeve Hyjnore. Ashtu si Ati e Biri, edhe Shpirti
i Shenjtë adhurohet e lavdërohet në të njëjtën mënyrë. Pastaj, vazhdon “Besojma:
Që foli me anë të profetëve
Shumë interesante kjo
pjesë! Këtu, “Besojma” na thotë se Shpirti i Shenjtë është frymëzuesi i vërtetë i
atyre, që shkruan Biblën. Çdo autor, që nga ungjilltarët tek apostujt e tek profetët
e Besëlidhjes së Vjetër, secili nga ata, që kanë marrë penën për të hedhur në letër
Shkrimin e Shenjtë, natyrisht, ka përdorur aftësitë, stilin, inteligjencën, njohuritë
e veta historike, gjeografike e shkencore. Por, E VËRTETA e atyre shkrimeve nuk vjen
prej tij, vjen nga Shpirti i Shenjtë. Prandaj, Bibla është Fjala e vërtetë e Hyjit.
Vërtet është shkruar me penën e njerëzve, por është frymëzuar nga Shpirti i Shenjtë,
nga vetë Zoti. Është kjo arsyeja, që para se të lexojmë Biblën, duhet të lutemi
për të pasur Urtinë e Shpirtit të Trinisë Shenjte, duhet t’i kërkojmë Hyjit të na
dikojë aftësinë për të kuptuar ç’është shkruar me frymën e Tij. Më pas, në Besojmë,
shpallim besimin tonë në Kishën Katolike e Apostolike, por për këtë do të flasim në
emisionin e ardhshëm.