അന്താരാഷ്ട്ര മത-സാംസ്ക്കാരിക സംവാദവേദി പ്രവര്‍ത്തനമാരംഭിക്കുന്നു

26 നവംബര്‍ 2012, വിയന്ന
അബ്ദുള്ള രാജാവിന്‍റെ പേരിലുള്ള അന്താരാഷ്ട്ര മത - സാംസ്ക്കാരിക സംവാദവേദി (King Abdullah bin Abdulaziz International Centre for Interreligious and Intercultural Dialogue-KAICIID) നവംബര്‍ 26ാം തിയതി തിങ്കളാഴ്ച ആസ്ട്രിയയുടെ തലസ്ഥാനമായ വിയെന്നയില്‍ ഉത്ഘാടനം ചെയ്യപ്പെട്ടു. സംവാദവേദിയില്‍ സ്ഥാപക – നിരീക്ഷക – അംഗത്വം (Founding Observer) സ്വീകരിച്ച പരിശുദ്ധ സിംഹാസനത്തിന്‍റെ ഔദ്യോഗിക പ്രതിനിധി സംഘം ഉത്ഘാടന ചടങ്ങില്‍ പങ്കെടുത്തു. 2011 ഒക്ടോബര്‍ മാസത്തില്‍ രൂപീകരിക്കപ്പെട്ട മത - സാംസ്ക്കാരിക സംവാദത്തിനായുള്ള അന്താരാഷ്ട്ര കേന്ദ്രമാണ് 26ാം തിയതി തിങ്കളാഴ്ച പ്രവര്‍ത്തനമാരംഭിച്ചത്.
യു.എന്നിന്‍റെ അംഗീകാരത്തോടെ പ്രവര്‍ത്തനമാരംഭിക്കുന്ന ഈ അന്താരാഷ്ട്ര സമിതിയില്‍ സൗദി അറേബ്യയെക്കൂടാതെ സ്പെയിന്‍, ഓസ്ട്രിയ എന്നീ രാജ്യങ്ങള്‍ സ്ഥാപക അംഗങ്ങളാണ്. മത-സാംസ്ക്കാരിക സംവാദത്തിനായുള്ള അന്താരാഷ്ട്ര സമിതിയുടെ ഡയറക്ടര്‍ ബോര്‍ഡില്‍ ഇസ്ലാംമതം, ഹിന്ദുമതം, യഹൂദമതം, ബുദ്ധമതം തുടങ്ങിയ, പ്രമുഖ ലോകമതങ്ങള്‍ക്ക് പ്രാതിനിധ്യമുണ്ട്. സമിതിയുടെ ഡയറക്ടര്‍ ബോര്‍ഡില്‍ കത്തോലിക്കാ സഭയെ പ്രതിനിധീകരിക്കുന്നത് മതാന്തര സംവാദത്തിനായുള്ള പൊന്തിഫിക്കല്‍ സമിതിയുടെ സെക്രട്ടറി ഫാ.മിഖല്‍ ആങ്ഹേല്‍ അയുസോ ഗ്വിക്സോട് ആണ്.