Бэнэдыкт XVI сустрэўся са сваякамі новых кардыналаў
26 лістапада Бэнэдыкт
XVI сустрэўся з новымі кардыналамі, членамі іх сем’яў, а таксама вернікамі, якія прыбылі
ў Вечны Горад, каб раздзяліць радасць прыняцця кардынальскай годнасці са сваімі іерархамі.
Да прысутных у Зале Паўла VI у Ватыкане Папа звярнуўся на мовах паходжання пурпуратаў.
Гаворачы па-англійску, Святы Айцец нагадаў, што кардыналы, працуючы ў Рымскай курыі,
а таксама ў мясцовых Касцёлах ва ўсім свеце, пакліканы асаблівым чынам падтрымліваць
Папу ў яго клопаце аб Паўсюдным Касцёле. “Яркія колеры вопраткі традыцыйна сведчаць
аб іх гатоўнасці бараніць Хрыстовы статак, аж да праліцця крыві”, - адзначыў Бэнэдыкт
XVI. Ён падкрэсліў, што новыя кардыналы прымаюць на сябе вялікую адказнасць, бо іх
місія заключаецца ў спрыянні большай святасці свету і адзінству Касцёла. Звяртаючыся
да франкамоўных кардыналаў і гасцей, які ў першую чаргу прыбылі з Блізкага Усходу,
каб падтрымаць мараніцкага Патрыярха, кардынала Бутраса Раі, Святы Айцец нагадаў аб
сваім нядаўнім візіце ў Ліван і падпісанні паслясінадальнай адгартацыі “Ecclesia in
Medio Oriente”. Пантыфік заклікаў кардынала Раі заахвочваць хрысціян не пакідаць гэты
рэгіён і спрыяць міру ў ім. Папа адзначыў, што сапраўдная згода тут можа наступіць,
калі прадстаўнікі розных веравызнанняў і культур будуць паважаць адно аднаго.
Вітаючы
іспанамоўных пілігрымаў з Калумбіі, якія прыбылі, каб раздзяліць радасць прыняцця
кардынальскай годнасці з арцыбіскупам Багаты Рубэнам Саласарам Гомесам, Папа заклікаў
іх горача маліцца за свайго іерарха, каб ён заставаўся сапраўдным сведкам Евангелля
збаўлення, праўды і веры.
Напрыканцы сваёй прамовы Папа яшчэ раз павіншаваў
новых кардыналаў і выказаў сваё спадзяванне на іх малітву і дапамогу.