Kisha katolike për Pavarësinë e Shqipërisë: Mungesat në Ditën e Flamurit, kur u nënshkrua
Akti i Pavarësisë.
Në emisionin e 16-të kushtuar kontributit të Kishës katolike për Pavarësinë e Shqipërisë
do të flasim për mungesat në ditën e festës së madhe. Për fat të keq, shumë gjëra
i mungojnë Kombit shqiptar këtë muaj, kulmor në kremtimet kushtuar 100-vjetorit të
Pavarësisë. Së pari, mungon origjinali i Aktit të shpalljes së Pavarësisë, nënshkruar
ditën e 28 –tës. Të gjitha gjurmët e këtij akti humbasin në vitin 1937, në arkivin
e Lef Nosit. Nënshkrues i Aktit të Pavarësisë, koleksionisti i shquar nga Elbasani,
kishte ruajtur një kopje të dokumentit, rëndësinë e të cilit e dinte fort mirë. Po
dokumenti dhe i zoti patën të njëjtin fat: u zhdukën që të dy. Lef Nosi u pushkatua
më 1944 si kolaboracionist, ndërsa koleksioni i tij i famshëm u plaçkit, si shumë
pasuri të tjera historike. Por, me sa duket, Dokumenti nuk ishte në këtë koleksion.
Deri më 1944, ishte në një kasetë sigurie, që i pëkiste Lef Nosit, në Bankën Shqiptare.
Pas kësaj date, u duk një kopje, e paplotë, e montuar, për të zhdukur ca firma të
padëshiruara, si ajo e Mid’hat Frashërit, për shembull. Prej këndej, Shqipëria
e pret 100-vjetorin e Pavarësisë me një Akt Pavarësie të fallsifikuar, në të cilin
numri i firmave në fund të tekstit nuk përkon me numrin e delegatëve, që kujtohen
në organin zyrtar të kohës “Përlindja e Shqipniës”. Besojmë se Shqipëria është një
nga vendet e rralla në botë që nuk i njeh emër për emër ata, që e bënë të lirë e të
mosvarme.
Fotografia Veç mungesës së aktit origjinal, nuk kemi asnjë
fotografi që ta dokumentojë ditën e 28-tës. Fotografia e vetme, në të cilën
shikojmë Ismail Qemalin me flamur në dorë, u bë një vit më vonë, në kryevjetorin e
shpalljes së pavarësisë. Fotografia do ta sqaronte një herë e mirë enigmën e flamurit,
duke u nisur nga format e hapjes së krahëve e të kthetrave të Shqiponjës, që ndryshojnë
në variante e ndryshme të atij, që paraqitet si Flamuri i shpalosur në Ditën e 28-tës,
në shtëpinë e Xhemil Bej Vlorës.
Ç’u bënë Njerëzit, që e shpallën Pavarësinë? Po
njerëzit, që e shpallën pavarësinë ç’u bënë? Sigurisht nuk patën fat më të mirë se
akti madhor, që patën nënshkruar. Madje ranë të parët viktima të tij. Një pjesë u
përzunë ose u detyruan të ravgojnë nëpër botë, si emigrantë politikë, në vite e kohë
të ndryshme. Mjafton të kujtojmë tri, nga figurat më në shenj: Ismail Qemali vdiq
në Peruxha; Dom Nikollë Kaçorri, në Vjenë (ku kishte shkuar të mjekonte një kancer
në stomak), Luigj Gurakuqi, më fatkeq se gjithë të tjerët, u vra tradhtisht në Bari.
Ismail Qemali la pas dy djem, trashëgimtarë të gjakut të tij. Po dom Nikolla, që ishte
prift, pra i pamartuar e Luigj Gurakuqi, që pati deklaruar se qe martuar me Shqipërinë,
lanë pas vetëm Pavarësinë në fasha, që e lindën dhe e përkundën në djepin e Vlorës!
Një pjesë mirë e atyre, që shpëtuan nga ky fat i zi e mbetën në atdhe, u pushkatuan
më 1944 nga komunistët, si shpëblim për aktin e madh që kishin kryer. Pak, shumë pak
mbyllën sytë, krejtësisht të harruar, në shtëpitë e tyre.