Solemniteti i Krishtit Mbret. Papa: pushteti i Jezusit është ai i së vërtetës dhe
i dashurisë e nuk do të bjerrë kurrë
Pushteti i Jezusit është ai i së vërtetës dhe i dashurisë e nuk do të bjerrë kurrë:
kështu tha Papa sot paradite, në Meshën e Solemnitetit të Krishtit Mbret, kremtuar
në Vatikan së bashku me gjashtë kardinajtë e rinj, që i krijoi në Koncistorin e djeshëm.
Homelia e Benediktit XVI u përqendrua krejtësisht në kuptimin e festës së sotme, e
cila na nxit ta pyesim veten nëse Jezusi është vërtet mbreti i jetës sonë, nëse tërhiqemi
nga dashuria e Tij, apo na intereson më shumë pushteti i kësaj bote. Papa na fton
të shohim drejt së ardhmes, drejt horizontit të fundëm të historisë, që s’është tjetër,
veçse mbretëria përfundimtare dhe e amshuar e Krishtit, kur Ai do të dëftohet me gjithë
pushtetin e vet për të gjykuar të gjallët e të vdekurit. Sa kohë ishte në tokë,
Jezusi zgjodhi udhën e përvujtërisë e të kryqit. Njerëzit, që prisnin një Mesi, i
cili do të vendoste drejtësinë me forcën e Tij hyjnore, pra me dhunë, mbetën të zhgënjyer.
Edhe dishepujt e Krishtit, pavarësisht se kishin jetuar së bashku me Jezusin e i kishin
dëgjuar Fjalët e Tij, mendonin se mbretëria qiellore ishte një lloj mbretërie politike,
e vendosur, edhe me ndihmën e forcës, shpjegoi Ati i Shenjtë: “Në Gjetsemani,
Pjetri nxorri shpatën nga milli dhe filloi të luftojë, por Jezusi e ndali (shih Gjn
18,10-11). Ai nuk donte të mbrohej me armë, por të plotësonte vullnetin e Atit deri
në fund e ta vendoste mbretërinë e vet jo me armë e me dhunë, por me brishtësinë në
dukje të dashurisë, që dhuron jetën. Mbretëria e Zotit është krejtësisht e ndryshme
nga ato tokësore”. Edhe Ponci Pilat u çudit para Jezusit, që fliste për një
pushtet, i cili nuk i përgjigjej logjikës së mbizotërimit e të forcës: “Pushteti
i Mesisë së vertetë, pushtet që nuk perëndon kurrë e që nuk mund të bjerrë kurrë,
nuk është ai i mbretërive të tokës, që ndërtohen e shkatërrohen, por është pushteti
i së vërtetës dhe i dashurisë. Kështu kuptojmë si mbretëria e kumtuar nga Jezusi përmes
shembëlltyrave dhe e shfaqur haptas e qartë para Prokurorit romak, është mbretëria
e së vërtetës, e vetmja, që u jep të gjitha gjërave dritën dhe madhështinë e tyre”. Ata,
që ndjekin Krishtin, në udhën e Kryqit, marrin pjesë në këtë mbretëri: “Me
flijimin e Tij, Jezusi na hapi rrugën për marrëdhënie të thella me Hyjin: në Të, bëhemi
bij të vërtetë adoptivë, pjesëmarrës në mbretërimin e Tij mbi botën. Atëherë, të jesh
dishepull i Jezusit, do të thotë të mos joshesh nga logjika e pushtetit të kësaj bote,
por të sjellësh në botë dritën e së vërtetës dhe të dashurisë së Zotit”. Solemniteti
i Krishtit Mbret është pra, një ftesë e fuqishme për ta kthyer zemrën gjithnjë kah
mbretëria e Zotit, duke pranuar sundimin e Hyjit, që sjell të Vërtetën në jetën tonë: “E
kërkojmë këtë përditë në lutjen “Ati ynë” me fjalët “Ardhtë mbretëria jote”, që është
sikur t’i themi Jezusit: o Zot, na bëj të jemi të tutë, jeto në ne, mblidhe rreth
Teje njerëzimin e vuajtur e të hapërdarë, që në Ty, gjithçka t’i nënshtrohet Atit
të mëshirës e të dashurisë”. Së fundi, Benedikti XI iu drejtua gjashtë kardinajve
të rinj dhe i ftoi të dëshmojnë mbretërinë e Hyjit e të vërtetën. Kjo do të thotë,
sqaroi Ati i Shenjtë, që Zoti të ketë gjithnjë përparësi në krahasim me interesat
e kësaj bote e të pushtetit të saj. Një impenjim, që kërkon dashuri deri në ekstrem,
deri në dhënien e jetës për njerëzit e dashur.