Պենետիկտոս ԺԶ. պապը երէկ Վատիկանի մէջ ընդունեց հանրապետութեան նախագահ զօր. Միշել Սլէյմանը,
որ մարոնի համայնքի Պշարա Ռայի պատրիարքին կարտինալական ձեռնադրութեան առիթով կը գտնուի
Հռոմ: Հանդիպումէն ետք պապը վերահաստատեց Լիբանանի նկատմամբ իր յատուկ սէրը եւ կոչ
ուղղեց լիբանանցիներուն կառչած մնալու ազգային երկխօսութեան ու Լիբանանի մէջ ապահովական
կայունութեան պահպանումին: Իր կարգին, նախագահ Սլէյման դրուատեց Վատիկանի կողմէ Լիբանանի
նկատմամբ ցուցաբերուած մնայուն զօրակցութիւնը եւ շնորհակալութիւն յայտնեց պապին` Ռայի
պատրիարքը կարտինալի աստիճանին բարձրացնելու առիթով: Հանդիպումին ընթացքին քննարկուեցան
Լիբանանի եւ Վատիկանի յարաբերութիւնները, ինչպէս նաեւ վերջերս պապին Լիբանան կատարած
պատմական այցելութեան արդիւնքները: Պապը շնորհակալութիւն յայտնեց նախագահ Սլէյմանի`
իրեն նկատմամբ ցուցաբերուած ջերմ ընդունելութեան համար եւ ընդգծեց, որ լիբանանցիներուն
միջեւ երկխօսութիւնը միակ միջոցն է անոնց հարցերուն լուծման, ինչպէս նաեւ երկրին ապահովական
կայունութեան ամրապնդումին:
Հռոմի Մէջ Նախագահ Սլէյման – Ռայի Պատրիարք
Հանդիպում Հանրապետութեան նախագահ զօր. Միշել Սլէյման նախանցեալ օր մեկնեցաւ Հռոմ`
նախագահելու համար մարոնի համայնքի Պշարա Ռայի պատրիարքի կարտինալական ձեռնադրութեան
մասնակցող լիբանանեան պատուիրակութեան: Այս շրջագիծին մէջ, նախագահ Սլէյման նախանցեալ
երեկոյեան ընդունեց Ռայի պատրիարքը, որ շնորհակալութիւն յայտնեց նախագահ Սլէյմանի եւ
Առաջին տիկին Ուաֆա Սլէյմանի` այդ արարողութեան անձամբ ներկայ գտնուելնուն համար: Միւս
կողմէ, նախկին երեսփոխան Ֆարիտ Հայքալ Խազեն Ռայի պատրիարքին ի պատիւ սարքեց ընթրիք մը,
որուն ընթացքին պատրիարքը մաղթեց, որ Լիբանան կարենայ դուրս գալ իրեն դէմ նիւթուող տագնապներէն: Լրագրողներու
հետ իր ունեցած զրոյցին ընթացքին Ռայի պատրիարքը նշեց, որ իր կարտինալական նշանակումը
Վատիկանէն ողջոյն մը կը նկատուի, ինչպէս նաեւ արժեւորում մը Լիբանանին, լիբանանցիներուն
եւ անոնց արժէքին: Լիբանանեան ներքին քաղաքական հարցերուն մասին հարցումի մը պատասխանելով`
Ռայի պատրիարքը հաստատեց, որ անհրաժեշտ է ընդառաջել հանրապետութեան նախագահ զօր. Միշել
Սլէյմանի ազգային երկխօսութեան կոչին կամ նուազագոյնը ներքին լիբանանեան խորհրդակցութիւններ
կատարել: Այս շրջագիծին մէջ Ռայի պատրիարքը շեշտեց, որ ինք կողմնակալութիւն չի կատարեր
եւ քաղաքական ոչ մէկ խմբաւորում կը պաշտպանէ: Ան նշեց նաեւ, որ եթէ կառավարութեան կազմի
փոփոխութեան կարիք կայ, ապա այդ մէկը պէտք է կատարել, սակայն առանց անիշխանութեան մատնելու
երկիրը: Նշենք, որ Ռայի պատրիարքը այսօր պիտի ստանայ կարտինալական իր խորհրդանշանը`
Պենետիկտոս ԺԶ. պապին նախագահութեամբ տեղի ունենալիք արարողութեան ընթացքին: Այս արարողութեան
ներկայ պիտի գտնուի 1500 հոգի հաշուող լիբանանեան ընդարձակ պատուիրակութիւն մը: