Бэнэдыкт XVI: Калегія кардыналаў уяўляе сабой аблічча Касцёла
“Калегія кардыналаў
уяўляе сабой аблічча Паўсюднага Касцёла”, - так ахарактэрызаваў ролю пурпуратаў Бэнэдыкт
XVI, звяртаючыся да ўдзельнікаў кансісторыі, якая адбылася 24 лістапада ў базыліцы
св. Пятра. Падчас яе Святы Айцец надаў кардынальскую годнасць шасці іерархам. У сваёй
гаміліі Папа засяродзіўся на паняцці “каталіцкі”. Ён нагадаў, што Хрыстус называў
сябе “Сынам Чалавечым”, “каб паказаць сапраўдны характар свайго месіянізму, сваёй
місіі, арыентаванай на ўсяго чалавека і кожную асобу, пераўзыходзячы любыя этнічныя,
нацыянальныя і рэлігійныя асаблівасці”. Бэнэдыкт XVI адзначыў, што менавіта наследуючы
Езуса, Касцёл імкнецца перамагаць любыя падзелы. Бэнэдыкт XVI нагадаў, што вакол апосталаў
ствараліся хрысціянскія супольнасці, і нягледзячы на тое, што яны знаходзіліся ў розных
рэгіёнах, заставаліся адзіным і паўсюдным Касцёлам. “Калі апосталы казалі аб Касцёле,
яны не казалі аб уласнай супольнасці, але аб Касцёле Хрыста, і настойвалі на адзінай
ідэнтычнасці, паўсюднай і цалкам “Каталіцкай”, якая рэалізуецца ў кожным лакальным
Касцёле”, - падкрэсліў Папа.
“У святло і перспектыву адзінства і паўсюднасці
Касцёла ўключана таксама Калегія кардыналаў: яна прадстаўляе сабой разнастайнасць
абліччаў, і, такім чынам, адлюстроўвае аблічча Паўсюднага Касцёла. Праз гэту кансісторыю
я хацеў бы асаблівым чынам падкрэсліць, што Касцёл – гэта Касцёл усіх народаў, і таму
ён выражаецца праз розныя культуры на розных кантынентах. Гэта Касцёл Пяцідзесятніцы,
які ў паліфоніі галасоў узносіць адзіны гарманічны спеў да жывога Бога”, - сказаў
Папа.
Звяртаючы да новых кардыналаў, Бэнэдыкт XVI нагадаў аб іх абавязку вернасці
Хрысту і Евангеллю і паслухмянасці Святому Апостальскаму Рымскаму Касцёлу. “Атрымліваючы
чырвоны берэт памятайце: ён сведчыць, што вы павінны быць гатовымі да мужных паводзін,
аж да праліцця ўласнай крыві, дзеля ўмацавання хрысціянскай веры, згоды і супакою
народу Божага. У той жа час уручэнне пярсцёнка будзе суправаджацца настаўленнем: “Ведай,
што з любоўю да Князя Апосталаў умацоўваецца твая любоў да Касцёла”, - нагадаў іерархам
Папа. Бэнэдыкт XVI адзначыў, што праз гэтыя жэсты і выразы кардыналам надаецца выключная
роля ў Касцёле.