Հայ գիրքի անդրանիկ տպագրութեան նուիրուած հանդիսութիւն Պէյրութի մէջ։
Կազմակերպութեամբ Հայ Կաթողիկէ Մեսրոպեան բարձրագոյն վարժարանի աշակերտական խորհուրդի
տեղեկատուական խմբակին, ուրբաթ 23 Նոյեմբերին, «ֆարաճեան» լսարանին մէջ տեղի ունեցաւ
Հայ գիրքի տպագրութեան 500-ամեակին նուիրուած հանդիսութիւն, մասնակցութեամբ՝ երկրորդական
դասարաննրու աշակերտութեան: Հանդիսութեան բացման խօսքին մէջ, Սէրլի Պէսիլ նշեց, որ
հայ տպագրութենէն 500 տարի ետք, հակառակ հաղորդակցութեան նոր միջոցներուն, համացանցին
եւ այլ սարքերուն, գիրքերուն արժէքը կը մնայ անփոխարինելի:Պէսիլ ըսաւ, որ հայութիւնը
եւ ի մասնաւորի հայ աշակերտութիւնը պէտք է շարունակէ մտահոգուիլ հայ գիրքով, որովհետեւ
դաստիարակութեան, լեզուի զարգացման, նկարագրի կազմաւորումին եւ պատմութեան պահպանման
լաւագոյն միջոցն է: Տեղեկատուական խմբակին կողմէ պատրաստուած հայ տպագրութեան նուիրուած
վաւերագրական տեսերիզի ցուցադրութենէն ետք, Մարինէ Հալլաճեան ջութակով նուագեց «Կռունկ»ը: Օրուան
պատգամախօսը Հ. Մեսրոպ վրդ. Թոփալեան, ամփոփ կէտերու մէջ ներկայացուց հայ տպագրութեան
պատմական արժէքն ու հայութեան համար կարեւորութիւնը: Ան ըսաւ, որ հայ գիրքը մարդու հոգին
կը հարստացնէ եւ միտքը կը զարգացնէ: Իր խօսքի աւարտին, Հայր Մեսրոպ ըսաւ, որ հայ աշակերտը
հայ գիրքին հետ երբեք առանձին չէ, եւ յոյս յայտնեց, որ հայ աշակերտը ամբողջական կերպով
կ՚արժեւորէ հայ գիրքը` զայն միշտ կարդալով եւ անոր մտերմանալով: Գեղարուեստական յայտագիրի
բ. մասով, Սթեֆանի Պալթայեան ասմունքեց Սիլվա Կապուտիկեանի «Խօսք իմ որդուն» բանաստեղծութիւնը:
Հանդիսութեան աւարտին, խօսք առաւ Մեսրոպեան վարժարանի տնօրէն պրն. Կրէկուար Գալուստ,
որ յայտնեց, թէ հայ աշակերտը իր պատմութեան հետ պէտք է ունենայ ամուր կապ,պէտք է հպարտ
զգայ, որ ինք հայ է, եւ պէտք է գիտակցի, որ մեծ ժառանգութիւն ունի: Տնօրէնը նշեց, որ
տեղեկատուական խմբակի կազմակերպած իւրայատուկ այս նախաձեռնութիւնը ոգեւորիչ էր եւ գնահատելի: