Ambasada shqiptare në Romë kremton 100-vjetorin e Pavarësisë
Nesër, ambasada shqiptare në Romë kremton 100-vjetorin e Pavarësisë, së bashku me
bashkatdhetarët nga e gjithë Italia. Në orën 18.00, në Hotel Mariott, në rrugën e
famshme Veneto, ambasadori, Shkëlqesia e Tij, z. Llesh Kola dhe bashkëshortja do të
presin të ftuarit e mbrëmjes festive, e cila zhvillohet çdo vit, por kësaj radhe është
e veçantë, pasi ka si kornizë ditëlindjen e shtetit të Shqipërisë, që mbush 100 vjeç,
moshë e respektuar edhe për një vend. Pas përurimit të djeshëm të ekspozitës “Thesaret
e Pasurisë Kulturore Shqiptare” në kompleksin “Vittoriano” në qendër të kryeqytetit
italian, një veprimtari tjetër do të zhvillohet nesër, gjithnjë në vazhdën e kremtimeve
të kësaj periudhe. Nga ora 9.30 deri më 17.30, në Universitetin “La Sapienza” të Romës,
do të zhvillohet Konferenca: “Sa afër, sa larg, 100 vjet Shqipëri e pavarur dhe marrëdhëniet
shqiptaro-italiane”. Konferenca zhvillohet nën kujdesin e Ministrive të Punëve
të Jashtme të Republikës së Shqipërisë dhe të Republikës Italiane, në bashkëpunim
me vetë Universitetin, me Ambasadën e Republikës së Shqipërisë në Itali, me Arkivin
e Shtetit Shqiptar dhe me Zyrën e Arkivit Historik të Shtabit të Përgjithshëm të Ushtrisë
Italiane. Takimin do ta përshëndesë Sh.T., z.Edmond Panariti, Ministri i Punëve
të Jashtme të Republikës së Shqipërisë, Sh.T., z. Llesh Kola, Ambasador i Republikës
së Shqipërisë në Itali dhe Prof.Luigi Frati, Rektor i Universitetit “La Sapienza”. Konferenca
do të jetë e ndarë në pesë panele: Paneli I - Populli i Shqiponjave në periudhën
e gjatë historike Paneli II - Pavarësia dhe Luftërat Botërore Panali III - Burimet
dhe Rekomandimet Paneli IV - Italianët studiojnë Shqipërinë Paneli V - Shqipëria
Bashkohore