Mund të shkruash një mendim në “Rrotullën e fesë: imzot Fizikela mbi nismën e Veprës
Romake.
Një rrotull pergamene 50 metra e gjatë, mbi të cilën shtegtarët, që vijnë në Romë,
mund t’i japin përgjigje me shkrim pyetjes: “Ç’është feja për ju?”. Quhet “Faith Scroll”
dhe u përurua pak ditë më parë pranë zyrave të Veprës Romake të Shtegtimeve, përballë
Shën Pjetrit. Mbi ‘Rrotullën e Fesë’ mund të shkruhet edhe një ndjet personal lutjeje,
që do të kujtohet, pastaj, gjatë Meshës në Bazilikën e Vatikanit. Ndër të parët,
që la mesazhin e tij, ishte imzot Rino Fizikela, kryetar i Këshillit Papnor për Ungjillëzimin
e Ri: “Përballë shumë pyetjeve, që shqetësojnë zemrën e çdo njeriu lidhur me kuptimin
e jetës, shkroi prelati, feja është përgjigjja e mbrame e përfundimtare, sepse të
bën të shikosh fytyrën e Krishtit, Birit të Zotit. E ftuam imzot Fizikelën
të na flasë pak më gjatë për nismën:
Përgjigje: - Është një nismë, që
bëhet akoma më shumë shprehje e komunikimit të përvojës së fesë, përvojë e fesë së
shumëfishtë, sepse përvojë kumtimi, përvojë lutjeje, përvojë dëshmie, e në këtë çast,
edhe përvojë komunikimi. Këtu shtegtarët mund t’i shkruajnë emocionet, që jetuan
pikërisht si shtegtarë tek Varri i Pjetrit. Këtu mund të shkruajnë ndjetet e tyre
të lutjeve, si shprehje e pjesëmarrjes në një fe më të madhe, në fenë e Kishës së
përhapur në mbarë botën. Po këtu mund të provosh edhe përvojën e fesë së Kishës. Përmes
këtij mjeti të vogël, ndjehet fort katoliciteti i Kishës, domethënë universaliteti
i saj. Këtu kanë nisur të shkruajnë besimtarë në të gjitha gjuhët e botës: nga gjuha
kineze, tek ajo australiane; nga portugalishtja tek shqipja, të gjitha gjuhët që njohim
rrotull botës sonë të vogël. E kjo mori gjuhësh bëhet edhe shprehje e një gjuhe të
vetme, që na bashkon, gjuhës së fesë sonë.
Pyetje: - Ç’do të bëhet më
pas me këtë ‘Rrotull’?
Përgjigje: - Shpresojmë se kjo ‘Rrotull’ do të
bëhet edhe mjet për të shprehur pasurinë e lutjeve të shumta e të përvojës së pasur
të besimtarëve, këtu, në Romë. Mund të bëhet, prandaj, për shprehjet më domethënëse,
botim i ri e mund të vihet edhe në internet. Ndërkaq, ta nisim këtë udhë lutjesh e
përvoje feje e pastaj shikojmë edhe ç’do të na sjellë kjo përvojë.