U hapën në Vatikan punimet e Kongresit të 23-të Botëror të Apostullimit të Detit
U hapën sot paradite, në Vatikan, punimet e Kongresit të 23–të Botëror tëApostullimi
të Detit, organizuar nga Këshilli Papnor i Baritorisë për Emigrantët dhe Endacakët,
me temë: “Ungjillëzimi i ri në botën detare”. Deri më 23 nëntor, pjesëmarrësit
do të reflektojnë mbi mënyrat e mjetet, që duhen përdorur për ta kumtuar Lajmin e
mirë në ujërat pa fund të deteve e të oqeaneve. Kongesin e hapi kardinali Antonio
Maria Vegliò, kryetar i dikasterit, duke kujtuar se ky është kongresi më i madh botëror,
që është organizuar ndonjë herë në historinë e apostullimit të detit e të detarëve.
E theksoi këtë, sepse në Vatikan janë mbledhur më se 400 delegatë-përfaqësues të njerëzve,
që e kalojnë jetën mbi ujë, ardhur nga 70 vende të botës. Takimi organizohet edhe
për të kujtuar 90-vjetorin e miratimit të Kushtetutave të para e të bekimit të këtij
Apostullimi nga ana e Piut XI. Zhvillimi teknologjik i industrisë detare, problemet
në rritje lidhur me jetën e punën e detarëve, sfidat e lindura nga normat e reja e
shpesh kufizuese dhe nga kriza ekonomike, nënvizoi Hirësia e Tij, bëjnë që Apostullimi
i detit të ungjillëzojë në kushte shumë të vështira.Por pavarësisht nga këto vështirësi,
bota e ujit është truall i begatë për ungjillëzim. Mjafton të kujtojmë mijëra anije
mbi ujërat, që mbështjellin globin, ekuipazhet e tyre me kultura, tradita e fe nga
më të ndryshmet, pa folur këtu për peshkatarët, edhe ata gjithë jetën me këmbë në
ujë. Këta njerëz jetojnë në hapësirat e ngushta të anijeve e të varkave, të shkëputur
nga familjet e nga bashkësitë e tyre të krishtera, pa ushqimin e duhur për fenë.
Prej këndej, kapelanët dhe vullnetarët e Apostullimit të Detit duhet të punojnë për
ta thelluar fenë e detarëve, duke ua shpallur Ungjillin edhe atyre, të cilët nuk e
njohin e duke rindezur, me dëshminë e krishterë, flakën e fesë, që luhatet në shpirtin
e këtyre njerëzve, gjithnjë në shtegtim.