Siria në qendër të Këshillit evropian të Ministrave të Jashtëm. Kondolica Rajs: SHBA-të
të veprojnë tani, ose vihet në rrezik krejt rajoni
Dhuna në Lindjen e Mesme, në qendër të takimit ndërmjet ministrave të jashtëm evropianë,
që u mbajt sot në Bruksel. Sidomos Siria tërheq gjithë vëmendjen e bashkësisë ndërkombëtare.
Në një artikull të sotëm, publikuar në gazetën amerikane “The Ëashington Post”, ish-sekretarja
e shtetit e presidentit Xhorxh Bush, Kondolica Rajs, thekson se pas përfundimit të
zgjedhjeve, është koha që Amerika të ndërhyjë në Siri. “Është gabim i madh - nënvizon
ajo - që konflikti me regjimin e Bashar al Asadit të konsiderohet thjesht humanitar”,
siç është bërë vitin e kaluar në SHBA-të. “Kemi të bëjmë me aktin e fundit historik
të shpërbërjes së Lindjes së Mesme”. Sipas zonjës Rajs, në Siri, është Irani që
po lufton ndoshta betejën e tij vendimtare për ta shtrirë ndikimin mbi të gjithë shiitët,
duke i bashkuar nën flamurin teokratik të Teheranit e duke shkatërruar kështu, integritetin
e Bahreinit, të Arabisë Saudite, të Irakut e të Libanit. Në përshkrimin e këtij projekti,
ekspertja e ish-Bashkimit Sovjetik nuk heziton ta krahasojë me thirrjen e shekullit
të 19-të “Proletarë të të gjitha vendeve bashkohuni”. “Tani, Karl Marksi është
në Iran” shkruan, duke iu referuar planit iranian për t’i mbledhur shiitët, “duke
përdorur grupe terroriste, Hezbollahët dhe milicinë shiite në jug të Irakut. E Siria
është kyçi, ura në Lindjen e Mesme arabe. Teherani as që e fsheh më se forcat e tij
të sigurisë punojnë për të mbështetur al Asadin”. “Por, ku janë SHBA-të?”, pyet
ish-anëtarja e dy administratave republikane, duke kritikuar faktin se për një vit
të tërë, Uashingtoni është përpjekur vetëm të bindë Rusinë dhe Kinën që ta braktisin
presidentin sirian. Gjatë ditëve të fundit, vëren Kondolica Rajs, Franca ndërhyri
në një boshllëk diplomatik, duke njohur aleancën e re të opozitës. SHBA-të duhet të
ndjekin Parisin, duhet të kontrollojnë e të armatosin një grup të bashkuar, duke vënë
si kusht impenjimin e tij pas Asadit. Pesha dhe ndikimi i amerikanëve janë të nevojshme.
Lënia e zgjidhjes së problemeve në dorën e fuqive rajonale, interesat e të cilave
nuk janë të njëjta me tonat, nuk do të bëjë tjetër veçse do të nxisë sektarizmin në
rritje”. Me një fjalë, Kondolica Rajs sugjeron rivendosjen e politikës interventiste
të ish-presidentit Bush. Por, edhe ajo vetë, në të njëjtin artikull, pranon se pavarësisht
nga shpresat për vendosjen e një demokracie shumëetnike e shumëfetare në Irak – të
famshmen demokraci “të eksportuar” të SHBA-ve – institucionet irakiane janë akoma
të brishta e vuajnë nga konfliktet në rajon, ashpërsimi i të cilave, sipas saj, është
edhe për faj të impenjimit të paktë amerikan.