Benedikti XVI në Engjëllin e Tënzot: luftat dhe fatkeqësitë e natyrës e shkatërrojnë
botën, Krishti është themeli i patundshëm.
Krishti është themeli i patundshëm i botës, i një bote që tronditet vazhdimisht nga
dhuna dhe fatkeqësitë e natyrës. Këtë mësim propozoi dje Benediktit XVI në lutjen
e Engjëllit të Tënzot, kremtuar nga dritarja e studios së tij mbi Sheshin e Shën Pjetrit.
Papa reflektoi mbi Ungjillin e liturgjisë së djeshme, në të cilin Krishti u flet Apostujve
për ardhjen e tij të dytë, në fund të kohëve.
Ungjilli flet për mjerimin e
atyre ditëve, kur dielli do të terratiset, hëna nuk do të lëshojë më dritë, yjet do
të bien nga qielli e trupat qiellorë do të lëkunden. Atëherë do të duket në qiell
shenja e Birit të njeriut. Është dita e fundit e botës, sipas figurave të Ungjillit
të Shën Mateut, ashtu si ua përshkruan Jezusi apostujve. E Jezusi jo vetëm kujton
figurat e lashta të Biblës, por edhe i plotëson, madje i relativizon këto figura,
shpjegoi Papa gjatë lutjes së Engjëllit të Tënzot, me një vegim tjetër të fuqishëm:
“Të gjitha fiset e dheut do të shohin Birin e njeriut duke ardhur mbi retë e qiellit
me fuqi e madhëri të madhe” : “Biri i njeriu është vetë Jezusi, që lidh
të tashmen me të ardhmen; fjalët e lashta të Profetëve gjejnë, më në fund, një qendër
në Vetjen e Mesisë nazarenas: ngjarja e vërtetë, e madhe, është Ai, që në mes të
tronditjeve të botës, mbetet përgjithnjë i patundshëm”. Skena, që pikturon
Krishti, nuk ka qëllim të ngjallë shqetësim, përkundrazi. Zoti dëshiron të na bëjë
të vetëdijëshëm se gjithçka kalon, ndërsa Fjala e Zotit nuk kalon kurrë, nuk ndryshon,
e përballë saj, secili nga ne do të japë llogari për sjelljen e vet, gjëja e vetme
që ka rëndësi në fundin e kohëve: “Jezusi nuk pëshkruan fundin e botës e,
kur përdor figura apokaliptike, nuk sillet si vegimtar. Përkundrazi, Ai dëshiron t’i
largojë dishepujt te tij të çdo epoke nga kurioziteti lidhur me datat e parashikimet,
duke u dhënë në dorë kyçin për një lexim më të thellë, themelor e, mbi të gjitha,
për t’u treguar rrugën e drejtë, në të cilën duhet të ecin, sot e nesër, që të hyjë
në jetën e pasosur”. Të gjithë elementet e kozmosit, pohoi Papa, i binden
Fjalës së Zotit, prej këndej, njeriu është i thirrur ta mbështesë, pa frikë, shpresën,
mbi Jezusin, Fjalën e mishëruar të Hyjit: “Miq të dashur, edhe në kohët tona
nuk mungojnë fatkeqësitë e natyrës e, për fat të keq, as luftërat e dhuna. Edhe sot
e ndjejmë nevojën e themelit të patundshëm për jetën tonë e për shpresën tonë, aq
më tepër për shkak të relativizmit, në të cilin jemi zhytur thellë”. Në
përfundim të lutjes së Engjëllit të Tënzot dhe të përshëndetjeve në gjuhë të ndryshme,
drejtuar turmës, mbledhur poshtë dritares së së tij, Benedikti XVI kujtoi lumnimin
e djeshëm në Pergamino të Argjentinës, ku u lartua në nderimet e elterit rregulltarja
Maria Kreshencia Pérez. E lumja e re, që jetoi në gjysmën e parë të shekullit të kaluar,
theksoi Papa, është model i ëmbëlsisë ungjillore, frymëzuar nga feja. Ta lavdërojmë
Zotin për dëshminë e saj. Në fund, një mendim për vullnetarët e bankës ushqimore,
apo të grumbullimit të ushqimeve, duke e inkurajuar këtë nismë e duke uruar t’i edukojë
besimtarët për ndarjen e përbashkët të të mirave materiale, në ndihmë të të varfërve
e, sidomos, të shumë familjeve, që kalojnë kohë të vështira.