Kardinali Koh: ndarja e të krishterëve, pengesa më e madhe për ungjillëzimin
Filloi dje pasdite, në selinë e dikasterit, e do të vijojë deri më 16 nëntor, mbledhja
plenare e Këshillit Papnor për nxitjen e bashkimit të të krishterëve. Në qendër të
vëmendjes, tema: “Rëndësia e ekumenizmit për ungjillëzimin e ri”. Takimi flet vetë
për vazhdimësinë e Sinodit të Ipeshkvijve, mbajtur pak kohë më parë në Vatikan, siç
e shpjegon, në mikrofonin tonë, kardinali Kurt Koh, kryetar i dikasterit për
bashkimin e të krishterëve:
Përgjigje:
- Pas Sinodit për Ungjillëzimin e Ri, ne po thellohemi në këtë argument,
parë në përmasën ekumenike. Lidhjen e ngushtë ndërmjet ungjillëzimit të ri dhe ekumenizmit
e gjejmë që në lutjen e Jezusit. Zoti i lutet Atit qiellor, që të gjithë dishepujt
e Tij të jenë një gjë e vetme, nga që vetëm kështu bota do të besojë se Ai është
vërtet Biri i Zotit. Që mesazhi i Ungjillit të bëhet i besueshëm për njerëzimin, kjo
varet shumë nga bashkimi i të krishterëve. Përçarja ndërmjet tyre është pengesa më
e madhe e ungjillëzimit.
Pyetje: - Dy fjalë për zhvillimin e kësaj
mbledhjeje plenare?
Përgjigje: - Mbledhja nisi me fjalimin
e hapjes, kushtuar temës së plenares, pasuar nga raporti rajonal, duke pasur parasysh
se situata në kontinente të ndryshme, nuk është aspak e njëllojtë. Unë do t’i dëgjoj
të gjitha të dhënat për situatat e ndryshme, do të informohem për sfidat e ungjillëzimit
të ri në të gjitha zonat. Më pas do të diskutojmë në grupe, për të parë si mund të
reflektojmë mbi këto tema. E qartë se do të bashkëpunojmë me Këshillin për Nxitjen
e Ungjillëzimit të Ri.
Pyetje: - Është e vërtetë se situata në kontinente
të ndryshme, nuk është e njëjtë, por sigurisht që këto ndryshime i lidh një fill të
kuq, i njëllojtë për të gjithë...
Përgjigje: - Ati i Shenjtë,
gjatë vizitës së tij në Erfurt, në takimin me përfaqësuesit e Kishës Evangjelike
në Gjermani, pati thënë se gjëja e parë që duhet të bëjmë sot për ekumenizmin, është
të japim të gjithë së bashku dëshminë e pranisë së Zotit, dëshminë, që i tregon botës
se ky Zot është në qendër të rruzullimit e të jetës së tij. Kemi të bëjmë, pra, me
çështjen e qendërsisë së Zotit: kjo është sfida kryesore sot për të krishterët, që
duhet të gjejnë rrugë e mënyra të përshtatshme për ta dëshmuar bashkërisht Fenë e
Ungjillin.