Անթիլիասի Հայ Գիրքի 34-րդ Ցուցահանդէսի Բացման Առիթով Արամ Ա. Կաթողիկոսը Պատգամեց.
«Հայ Գի՛րքը Հայ Մարդուն Փառքը, Պատիւն Ու Պարտքն Է» ։ Կիրակի, 11
նոյեմբերին Մեծի Տանն Կիլիկիոյ կաթողիկոսութեան կողմէ կազմակերպուած հայ գիրքի 34-րդ
ցուցահանդէսի բացումը կատարելով` Արամ Ա. կաթողիկոս իր պատգամին մէջ իր մտահոգութիւնը
յայտնելով հայ մարդուն հեռու ըլլալուն համար հայ գրքի հանդէպ, ըսաւ. ՜՜Հայ գիրքը տագնապի
մէջ է, որովհետեւ սկսած է որբանալ ու փոշիներու մէջ թաղուիլ: Հայ գիրքին տագնապը նաեւ
մե՛ր տագնապն է, որովհետեւ` Առանց հայ գիրքին աղքա՛տ է մեր կեանքը. Առանց հայ գիրքին
անգոյն է մեր կեանքը…՝՝: Ապա, վեհափառը անդրադարձաւ պատմութեան ընթացքին հայ գիրքին
ունեցած առանցքային ներկայութեան ու դերակատարութեան հայ ժողովուրդի կեանքին մէջ։ Վեհափառը
յիշեց նաեւ թէ այս տարի ԵՈՒՆԵՍՔՕ-ի կողմէ Երեւանը գիրքի մայրաքաղաք հռչակուած է, եւ
միաժամանակ 500-ամեակն է հայ գիրքի տպագրութեան, ան ըսաւ. «Ներկայ տարուան ընթացքին համազգային
տարողութեամբ ՓԱՌՔԸ հիւսեցինք հայ գիրքին` հանդէսներ ծրագրելով, հրատարակութիւններ կատարելով,
կոթողներ բարձրացնելով, համագումարներ կազմակերպելով: Այլ խօսքով` բարձրագոյն աստիճանի
վրայ արժանի յարգանքը ընծայեցինք հայ գիրքին, անգամ մը եւս յիշեցնելով մեր ժողովուրդի
զաւակներուն թէ` հայ գիրքը հայութեամբ կը շնչէ ու հայու հարազատ արժէքներով հայ մարդը
կը շնչաւորէ: Հայ գիրքը հայ ժողովուրդի աշխարհացրիւ զաւակները իրար կը միացնէ` նո՛յն
հոգեւոր, մշակութային ու ազգային արժէքներուն, աւանդութիւններուն ու ձգտումներուն շուրջ:
Հայ գիրքը ոսկեկամուրջ մը կը նետէ մեր ներկային ու անցեալին միջեւ եւ մեզ կ՛առաջնորդէ
դէպի լուսեղէն ապագայ՝՝: Արամ Ա. կարեւորութեամբ անդրադարձաւ հայ գիրքի ետին գտնուող
հայ գրողին նաեւ իր գնահատանքը յայտնեց հայ գիրքի մեկենասներուն, հրատարակիչներուն եւ
հիմնադրամներուն` ընդգծելով միաժամանակ Անթիլիասի կաթողիկոսութեան կատարած հրատարակչական
դերը: Հուսկ ըսաւ. ՜՜ Հայ գիրքը է՛ եւ մի՛շտ պիտի մնայ բոլոր ժամանակներու բոլոր սերունդներուն
համար մարդակերտումի ու հայակերտումի դպրոց: Ներկայ տեղեկատուութեան արհեստագիտութիւնը
իր հրապուրիչ գիւտերով որքան ալ փորձէ մեզ հեռու պահել հայ գիրքէն, հայ մարդը իր գերագոյն
ճիգը պէտք է կատարէ հաւատարիմ մնալու հայ գրքին, իր կեանքի մտերիմ ընկերոջ՝՝: Նշենք,
որ հայ գիրքի ցուցահանդէսի բացման ներկայ էին միաբան հայրեր, դպրեվանքի ուսանողները եւ
հոծ թիւով գրասէր հասարակութիւն մը: Այս առիթով դպրեվանքի սաները ներկայացուցին գեղարուեստական
կոկիկ յայտագիր մը` յաւուր պատշաճի երգերով: Վեհափառ հայրապետի պատգամէն ետք ներկաները
հետաքրքրութեամբ մօտեցան սեղաններուն եւ վայելեցին գիրքերու մտերմութիւնը: