Në kuadrin e Kuvendit të “Scholae Cantorum”, që mbahet në Romë sot dhe nesër, rreth
6 mijë anëtarë të shoqatës së Shën Çeçilies u takuan me Papën Benedikti XVI, i cili
i priti në audiencë në Sallën Pali VI në Vatikan. Është hera e parë, që Ati i
Shenjtë Jozef Ratcinger pret këtë shoqatë italiane, themeluar në vitin 1584 e miratuar
një vit më vonë nga Papa Siksti V, për të “nxitur e mbrojtur muzikën kishtare apo
liturgjike sipas frymës së Kishës, duke respektuar me saktësi direktivat kishtare”.
Anëtarët e kësaj shoqate do të marrin pjesë edhe në Lutjen e Engjëllit të Tënzot
në sheshin e Shën Pjetrit në Vatikan, së bashku me besimtarët e ardhur nga e gjithë
bota. Kuvendi po zhvillohet sa në Sallën Pali VI, aq në Bazilikën e Shën Pjetrit,
duke alternuar këngë nga kompozitorë të famshëm të muzikës kishtare me kremtime eukaristike.