Սերժ Սարգսեանի Շնորհաւորական Ուղերձը՝ Միացեալ Նահանգներու Նախագահ Պարաք Օպամային։
Նոյնպէս Ամերիկայի Հայ Դատի Մարմինը Կը Շնորհաւորէ Օպաման։
Հայաստանի նախագահ Սերժ Սարգսեան շնորհաւորական ուղերձ յղեց Միացեալ Նահանգներու նախագահ
Պարաք Օպամային` նախագահի պաշտօնին վերընտրուելուն առիթով: Ուղերձին մէջ մասնաւորապէս
ըսուած է. «Մեծարգոյ պարոն նախագահ, Սրտանց կը շնորհաւորեմ ձեզ Ամերիկայի Միացեալ
Նահանգներու նախագահի պաշտօնին վերընտրուելու առիթով: Ձեր տպաւորիչ յաղթանակը ապացուցեց,
որ այն ուղին, որ դուք որդեգրած էք Միացեալ Նահանգները առաջ տանելու համար, ինչպէս նաեւ
ձեր վարած արտաքին եւ ներքին քաղաքականութիւնը, համահունչ են ամերիկացի ժողովուրդի մեծամասնութեան
սպասելիքներուն: Մենք շնորհակալ ենք այն աջակցութեան համար, որ Միացեալ Նահանգները
շարունակաբար կը ցուցաբերեն Հայաստանին: Զիս մեծապէս կը գոհացնէ այն փաստը, որ ձեր վերընտրուիլը
թոյլ պիտի տայ շարունակելու աշխուժօրէն զարգացնել եւ խորացնել հայ-ամերիկեան յարաբերութիւնները,
որոնք մեր երկկողմ պատմութեան ամբողջ ընթացքին այս պահուն կը գտնուին ամենաբարձր մակարդակի
վրայ: Համոզուած եմ, որ մեր բազմաբնոյթ համագործակցութիւնը նոր յաջողութիւններ պիտի արձանագրէ
յառաջիկայ չորս տարիներուն ընթացքին` ի շահ մեր ժողովուրդներուն: Մէկ անգամ եւս ընդունեցէք
խնդրեմ, պարոն նախագահ, իմ ջերմ շնորհաւորանքներս եւ լաւագոյն մաղթանքներս»: Նոյնպէս
Ամերիկայի Հայ Դատի Մարմինը հաղորդագրութիւն մը հրապարակելով շնորհաւորած է Պարաք Օպաման
Միացեալ Նահանգներու նախագահ վերընտրուելուն առիթով: Մարմինի ատենապետ Քեն Խաչիկեան
հաղորդագրութեան մէջ մասնաւորաբար կը նշէ, որ «մենք կը շնորհաւորենք նախագահ Օպաման,
նաեւ նախկին նահանգապետ Ռոմնին` լաւ քարոզարշաւի համար: Շնորհակալութիւն կը յայտնենք
նաեւ ամերիկահայ ընտրողներուն, որոնք ընտրութեան գացին` ընտրելու տեղական այն թեկնածուները,
որոնք մեզի կ՛աջակցին` համայնքը յուզող հարցերուն մէջ»: Հաղորդագրութեան մէջ կը նշուի
նաեւ, որ Քոնկրեսի թեկնածուներէն, որոնց կ՛աջակցի հայ համայնքը, մեծ առաւելութեամբ յաղթած
են Պոպ Մենենտեսը, Էտըմ Շիֆը, Էտ Ռոյսը, Ֆրենք Փալոնը եւ ուրիշներ: Հայ Դատի գրասենեակը
Միացեալ Նահանգներու 30 նահանգներու մէջ կ՛աջակցէր աւելի քան 140 թեկնածուներու: