Ipeshkvijtë e Burundit, të kënaqur me Marrëveshjen-kuadër me Selinë e Shenjtë
“Marrëveshje, që siguron paqen shoqërore e fetare në vend, pasi popullsia katolike
dhe barinjtë e saj shohin se kërkesat e tyre kuptohen e mbrohen nga shteti”. Kështu
e komentojnë ipeshkvijtë e Burundit, nënshkrimin e Marrëveshjes-bazë ndërmjet qeverisë
dhe Selisë së Shenjtë, të martën e sapokaluar. Në Premisat e Marrëveshjes, sqarohet
se ajo synon të japë një kuadër juridik për marrëdhëniet ndërmjet shtetit e Kishës,
për të favorizuar bashkëpunimin në të mirën e popullsisë së Burundit. Ky vend është
më i krishteri i Afrikës, me 65% të popullsisë katolike. Më 11 shkurt 1963, këtu u
hap përfaqësia e parë e Selisë së Shenjtë në kontinentin e zi.
Duke kujtuar
se marrëdhëniet ndërmjet shtetit e Kishës nuk kanë qenë gjithmonë të mira, komunikata
nënvizon se marrëveshja tregon vullnetin e qeverisë për të vazhduar procesin demokratik,
që karakterizohet si nga respektimi i të drejtave të njeriut, ashtu edhe nga nderimi
i Kishës Katolike. Duke krijuar kuadrin juridik, organizatat dhe institucionet katolike
nxiten të hapin shkolla, spitale dhe veprimtari të tjera në dobi të popullsisë.