Dhimbja e Papës për viktimat e tërmetit në Guatemalë: ndihmat qofshin të frytshme
e bujare
Me një mesazh, Papa Benedikti XVI shprehu sot dhimbjen e tij të thellë për viktimat
e tërmetit, që goditi dje rajonet veriperëndimore të Guatemalës. Deri tani, të vdekurit
kanë kaluar shifrën 50, mëse 20 nuk gjenden akoma, ndërsa të shpërngulurit i kalojnë
17 mijë vetët, për të mos llogaritur dëmet materiale, si shembja e shtëpive dhe shkatërrimi
i infrastrukturave. Tërmeti prej 7,4 ballësh të shkallës Rihter u ndje sidomos në
zonën e San Markos, ndër më të mëdhatë e vendit, në kufi me Meksikën. Benedikti XVI
u shfaq popullsive afërsinë e tij shpirtërore në këtë fatkeqësi të jashtëzakonshme
natyrore. Papa bën thirrje për solidaritet vëllazëror, duke inkurajuar të gjitha bashkësitë
e krishtera, institucionet civile dhe njerëzit vullnetmirë t’i ndihmojnë viktimat
me bujari, sa më shpejt të jetë e mundur. Së fundi, Ati i Shenjtë i lutet Zojës Rruzare,
për të cilën ka devocion të veçantë populli i Guatemalës, t’i mbrojë me dashuri të
gjithë ata, që ndjejnë nevojën për ngushëllim në këtë çast të vështirë e të trishtuar.