Thirrje e Papës për Sirinë: “Të bëhet ç’është e mundur për paqen, sepse një ditë mund
të jetë tepër vonë!”.
Sot, në përfundim të audiencës së përgjithshme, Papa bëri përsëri thirrje për paqe
në Siri. Benedikti XVI vijon të ndjekë me vëmendje të veçantë situatën tragjike
të dhunës në Siri, ku nuk pushon vringëllima e armëve e vijon të shtohet numri i viktimave
dhe vuajtja çnjerëzore e popullsisë, posaçërisht e atyre, që detyrohen të braktisin
vatrat. Pikërisht për t’i shprehur solidaritetin e tij e të mbarë Kishës popullsisë
së Sirisë dhe afërsinë shpirtërore bashkësisë së krishterë në vend, Papa pati dëshirë
të dërgonte një delegacion të Etërve Sinodalë në Damask: “Për
fat të keq rrethana e zhvillime të ndryshme nuk krijuan mundësi për realizimin e nismës
sipas dëshirës, e prandaj vendosa t’i besoj një mision të posaçëm kardinalit Sarah,
kryetar i Këshillit Papnor Cor Unum”. Që sot Hirësia e Tij ndodhet në
Liban, ku do të qëndrojë deri më 10 nëntor, për t’u takuar me barinjtë dhe besimtarët
e Kishave të pranishme në Siri. Kardinali do të vizitojë edhe disa refugjatë, ardhur
nga ky vend e do të kryesojë takimin për koordinimin e veprimtarisë së institucioneve
bamirëse katolike, të cilave Selia e Shenjtë u ka kërkuar të impenjohen me të gjitha
forcat në ndihmë të popullsisë siriane, brenda e jashtë vendit: “Ndërsa
i lartoj lutjen time Zotit, përsëris ftesën drejtuar palëve në konflikt dhe të gjithë
atyre, që e kanë për zemër të mirën e Sirisë, të mos kursejnë asnjë përpjekje në kërkim
të paqes dhe të vijojnë, përmes dialogut, ecjen në rrugët, që çojnë drejt bashkëjetesës
paqësore, në pritje të zgjidhjes së përshtatshme politike të konfliktit. Duhet të
bëjmë ç’është e mundur, sepse një ditë mund të jetë tepër vonë”.