Пра медыцынскія ўстановы
ў працэсе абвяшчэння Евангелля будуць размаўляць удзельнікі кангрэсу, які пройдзе
ў Ватыкане 15-17 лістапада. “Шпіталь – месца евангелізацыі. Місія чалавечая і духоўная”,
так гучыць тэма XXVII Міжнароднай канферэнцыі Папскай рады пастырства работнікаў сферы
аховы здароўя. Асамблея, якая пройдзе ў Новай сінадальнай зале, засяродзіцца на трох
напрамках: “Духоўнасць і дыяконія міласэрнасці”, “Гісторыя і місія”, “Этыка і гуманізацыя”.
17 лістапада ўдзельнікі збяруцца ў Зале Паўла VI для разважання і малітвы.
На
заканчэнне форуму запланавана сустрэча ўдзельнікаў з папам Бэнэдыктам XVI, - паведаміў
арцыбіскуп Зыгмунт Зімоўскі, старшыня Папскай рады пастырства работнікаў сферы аховы
здароўя. “На сустрэчу з Наступнікам св. Пятра, - дадаў ён - таксама запрошаны рымскія
медыкі і члены іх сем’яў, студэнты медыцынскіх навучальных устаноў, члены арганізацый,
чыя дзейнасць звязана з клопатам пра хворых. XXVII Міжнародная канферэнцыя, адзначыў
арцыбіскуп Зімоўскі, “стане важнай часткай Году веры і пройдзе ў сугуччы з дзьвюма
падзеямі, якія нядаўна адбыліся ў Ватыкане: XIII Генеральнай асамблеяй Сінода Біскупаў
і 50-годдзем адкрыцця ІІ Ватыканскага Сабору”.
Іерарх паведаміў, што на штогадовы
медыцынскі форум запрошаны найбольш выбітныя эксперты, якія дапамогуць глыбока паглядзець
на сёлетнюю тэматыку. Ён паінфармаваў, што ў канферэнцыі прымуць удзел некалькі сотняў
удзельнікаў з усяго свету.