Ipeshkvi Tauadros është Patriku i ri kopto-ortodoks
Ipeshkvi Tauadros, ish-ndihmësi i Beherisë, është Patriku i ri kopto-ortodoks, pas
vdekjes së Shenudës III. Emri i tij u zgjodh dje, sipas traditës, nga një fëmijë,
në përfundim të kremtimit në katedralen kopte të Kajros, në të cilin mori pjesë krejt
Sinodi i Shenjtë. Tauadros, 60 vjeçar, ka mbaruar për Farmaci, para se të fillonte
jetën e tij si rregulltar. Mediat egjiptiane vënë në dukje aftësitë e tij teologjike
dhe veprimtarinë e tij baritore me rininë. Tauadros është Patriku i 118-të kopto-ortodoks,
por i pari pas rënies së presidentit Mubarak, në një epokë kur në pushtet është partia
e “Vëllezërve Myslimanë”, të cilët i shprehën papës së ri (siç quhet Patriku nga kopto-ortodoksët)
përgëzimet e tyre. Për rëndësinë e kësaj zgjedhjeje morëm në telefon në Kajro, imzot
Barnaba El Soriani, ipeshkëv i dioqezës kopto-ortodokse të shën Gjergjit në Romë: Papa
Tauandros II është njeri shumë aktiv për gjithë popullin kopt, sidomos këtu në Egjipt.
Na është bërë një dhuratë: dhuratë e madhe për të gjithë! Presim të ndjekë të njëjtën
rrugë të Papës Shenuda III, në shkollën e të cilit është rritur, si bir i tij shpirtëror.
Prandaj, do ta ndjekë. Jemi të gjithë të emocionuar. Zgjedhja e Patrikut të
ri është shumë e rëndësishme për koptët, sidomos në Egjiptin e tanishëm, ku gjendja
është mjaft delikate… Po. Është njeri shumë i qetë dhe i dashur nga njerëzit,
nga ata që e kanë njohur tek ata që punojnë me të. E ndjejmë se me të, Kisha do të
ecë përpara me dialog. Patriku i ri shpreson shumë tek dialogu.