Мінск: малітва за загінуўшых у былым лагеры смерці
Сёння, у дзень успаміну
ўсіх памерлых, вернікі мінскай парафіі Хрыста Збаўцы маліліся за бязвінных ахвяр Другой
сусветнай вайны. Яны сабраліся каля брацкай магілы ў мемарыяльным комплексе “Малы
Трасцянец”. На гэтым месцы за адзін толькі дзень 30 ліпеня 1944 г. фашысты спалілі
шэсць з паловай тысяч чалавек. Усяго ў Трасцянцы – а гэта быў адзін з самых вялікіх
лагераў смерці на акупаванай немцамі тэрыторыі – згінула 206 тыс. чалавек – мірных
жыхароў, ваеннапалонных, а таксама грамадзян Польшчы, Аўстрыі, Чэхаславакіі. Сярод
іх былі і каталіцкія святары, расказаў пробашч парафіі кс. Юрый Санько. “Гэта трагедыя
нашага народу, шмат святароў загінула ў гэтым канцлагеры, шмат вернікаў, якія проста
жылі і дзякавалі Богу за тое, што жывуць на гэтай зямлі, аднак адбылося так, што нехта
вырашыў іх лёс. І гэта наш хрысціянскі абавязак маліцца за іх. І нават больш таго
– выпрошваць у гэтых людзей і для сябе нейкіх ласк, заступніцтва перад Богам, таму
што гэта мучанікі, святыя нашых часоў”, - лічыць кс. Санько. Напрыклад, ксёндз Вінцэнт
Гадлеўскі – ён загінуў у Трасцянцы за некалькі гадзін да Божага Нараджэння 1942 году.
Могілкі родных Яніны Лук’яновіч знаходзяцца далёка, туды яна яшчэ паедзе,
але у гэты дзень прыйшла сюды, каб памаліцца за памерлых, няхай і не знаёмых асабіста,
кажа парафіянка. “Гэта вельмі важна, таму што нашы продкі далёка, але мы молімся і
як бы адначасова лучымся з імі, молімся і за сваіх продкаў”.
Ушанаваць памяць
усіх памерлых сёння прыйшлі каля 15 парафіян. Нягледзячы на няспынны дождж, маліліся
пад адкрытым небам. А у будучым, калі ў парафіі з’явіцца свой храм, па задумцы, ён
стане помнікам трагедыі ў Трасцянцы і напамінам будучым пакаленням пра павагу да чалавечага
жыцця.