Shkodra shënon 55 vjetorin e Universitetit “Luigj Gurakuqi!
Aktivitetet dyditore të kushtuar 55 vjetorit të Universitetit "Luigj Gurakuqi" të
Shkodrës janë mbyllur me një konferencë shkencore, ku u mbajtën kumtesa të shumta
nga drejtues, pedagoge dhe historianë të këtij institucioni e më gjërë. Ne kuadrin
e aktiviteteve u hap ekspozita "Biblioteka e dyerve të hapura", ku në qendër të vëmendjes
ka qenë sidomos paraqitja e Antikuarit të Bibliotekës, në arkivin e të ciles bëjnë
pjesë vepra mbi 500 vjeçare, një pjesë e të cilave ekspozohen për herë të parë për
publikun. Drejtorja e bibliotekës, Alida Luka, theksoi se biblioteka shkencore
është angazhuar vazhdimisht në aktivitete të shumta të karakterit akademik, si dhe
ka qenë pjesë e projekteve të rëndësishme. Ajo evidentoi edhe projektet e zbatuara
në aktivitetin e kësaj biblioteke, ku tërheqin vëmendjen pasurimi i fondit dhe blerjet
e reja, përcaktimi i një hapësire për punën në grup të studentëve etj. Për
Fatmir Vadahin, prof. as. Dr. zv/rektor i Universitetit, vlerat e kësaj biblioteke
i kalojnë kufijtë e institucionit të tyre duke dhënë kontributin e saj edhe në traditën
dhe historinë 100 vjeçare të shtetit shqiptar. "Sot biblioteka funksionon me parametrat
bashkëkohore të shërbimit, kërkimit dhe informacionit", tha ai. Ndërkohë,
u organizua edhe konferenca "55 vjet bibliotekë universitare", ku u fol për historikun
e bibliotekës universitare. Ish-drejtues dhe punonjës të bibliotekës sollën përmes
kujtimeve eksperiencat dhe kontributet e tyre ndër vite. Biblioteka e Universitetit
"Luigj Gurakuqi" të Shkodrës ka filluar veprimtarinë e saj me krijimin e Institutit
Pedagogjik në vitin 1957, me një fond prej rreth 1 000 librash, kryesisht në shqip,
ndërkohë që sot kjo bibliotekë ka një fond shumë të pasur që mbulojnë kryesisht fushat
e pedagogjisë, psikologjisë, didaktikës, ekonomisë, jurisprudencës, letërsisë, gjuhës
etj. (nga ATSH-ja)