Në atmosferën e solemnitetit të të Gjithë Shenjtorëve, kur kremtohen jo vetëm
Shenjtorët e njohur, por edhe të panjohurit, ata që flijuan jetë e emër për Krishtin,
po i kujtojmë përmes shkrimit të Atë Gjuseppe Patti-t, titulluar: “Gjak në Shkodër”,
që përmbledh gjithë tragjedinë, por edhe epopenë, shkruar nga besimtarët në Krishtin
gjatë diktaturës komuniste në Shqipëri.
Me të vërtetë, o Zot, ti ishte këtu,
me ne, e na ndihmove ta vuajmë mbi korpin tonë mëkatin e vëllezërve. Na
rrahën e na mbytën, vezë të valuara na vunë nën sqetulla, e kështu na lidhën, na
dogjën mish e kocka; për muaj na lanë lakuriq; lidhur për drurët e kuvendit në
dimrin e acartë. Na ftohën ngrohtësinë e frymës, u dogjëm pa flakë për fenë
tonë! Për ditë e ditë na i lanë vashat lidhur me hekura, natën i varën për
krahësh. Na shkarkuan korrent ndër veshë e shumë nga ne vdiqën kështu, në tortura! Na
i ngulën ku s’thuhet, bajonetat e pushkëve të tyre, i zhveshën meshtarët lakuriq; e
mbyllën në thes njërën nga bijat tona, me një maçok të tërbuar, i ranë sa mundën
thesit der’sa u bë mish e gjak. Na mbajtën për javë e muaj në nevojtoret
e qelbura të burgut, nën shkallët që të shtypnin. Na munduan, e shumë, në
korp e në shpirt. Na lanë për çlodhje një rrip çimento, prej 39 centimetrash,
i lagën me ujë qelitë tona që të kalbeshim për së gjalli e ashtu të mohonim çka
ne s’e mohuam. Çka s’mund ta mohonim për të mos mohuar vetveten për të mos
mohuar vetë jetën! Na i kripën plagët, atëherë, e vashat tona i mbyllën në
një qeli me djem myslimanë e vashën myslimane, në qeli e vunë me fratin. E
mbytën Marinë, pasi e lanë të kalbej për së gjalli pa ngrënë e pa pirë, mbuluar
me lecka të përgjakura. E mbytën vashën, rininë nuk e gëzoi. Na i thyen
dhëmbët me shkelma e grushta; na i copëtuan gishtrinjtë s’u ngopën kur thonjtë të
nxirë nga dhimbja, u këputën e ranë. Na e mbushën trupin me miza me pleshta,
me çimka, me morra. Pastaj dizinfektuan qelitë, e na e zunë frymën me helme si
të ishim insekte. Na varën për këmbësh si mishin te kasapi. Shqipëri e gjakosur! Vërtet
Zoti ishte këtu, me ne, e na kërkoi të pranonim mbi korpin tonë mëkatin e vëllezërve! U
kalbëm kanalesh që i hapëm në pranga e shumë prej nesh u kallën në baltë. Na
morën fytyrë e korp; e mbetëm pa formë e pa jetë. Na bënë të zvarritemi, si
krimbat ndër galeritë e minierave, nën tokë. Me të vërtetë, o Zot, ti ishte
këtu, me ne, e na kërkove ta marrim mbi mishin e gjakun tonë mëkatin e vëllezërve. Na
donin femohues, spiunë të vëllezërve na donin, Fëmijët tanë nuk guxuan të
bëjnë as shenjën e kryqit, për të mos na parë në pranga. Na shtrënguan të jepnim
dëshmi të rreme të tradhtonim mëmë e atë të burgosnim mik e shok. As lot
nuk mund të derdhnim për vëllezërit e vrarë, në burgjet e errëta. Me të vërtetë,
o Zot, ti ishte këtu, me ne, e na ndihmove ta vuajmë mbi korpin tonë mëkatin
e vëllezërve. Na vodhën veprat, artin, kulturën na hoqën librin e pendën, ngjyrat,
format e tingujt. Me të vërtetë, o Zot, ti ishte këtu, me ne, e na ndihmove
ta vuajmë mbi korpin tonë mëkatin e vëllezërve. Fatlumët tanë, brohoritën para
plotonit “Rroftë Krishti Mbret!” E ranë pas murit të Rrëmajit. E qentë rrëmuan
në gropat vetëm një pëllëmbë nën dhe. I nxorrën gjymtyrët e bekuara. Por
as me kaq nuk u ngopën: e dogjën Kapelën, rrënuan dhe varret. Me të vërtetë,
o Zot, ti ishte këtu, me ne, e na ndihmove ta vuajmë mbi korpin tonë mëkatin
e vëllezërve. Dogjën, rrënuan gjithçka, por fenë nuk mundën ta preknin. Mbeti
pishtar në errësirë në eklips të arsyes, t’humanizmit, të vlerave, kur gjithçka,
gjithçka u shkatërrua. Po të mundnin dhe shpirtin do të na e kishin shkulur. Po
këtë jo, nuk mundën ta bëjnë. Se ne ta falëm ty, o Zot shpirtin tonë. Veç
britmat lamë pas, melodi përvëlimi mushkërish coptuar në tortura. E ty t’i
besuam trupat e ligështuar, e trupat e vrarë që presin t’i kthesh në korpe
të lumnuar. Zot, na ndihmo të mos marrim hak, se s’duam që feja dëshmuar
me jetë, të shkojë kot e shpirtin të humbasim tani që u zgjuam të dërmuar pas
ëndrrash përlyer me djersë e me gjak. Errësirën në mes të dritës më s’e duron
njeri! Shqipëria dalë nga varri, hakmarrjen s’e duron! Shpëtonae, Zot, shpirtin mbuluar
me plagë. E jepna paqë e pajtim. Këto fjalë janë erë temjani na hapin buzën
në lutje: O Zot, Ti rri prap me ne e na ndihmo ta vuajmë në korpin tonë, mëkatin
e vëllezërve!