«Սուրիական Տագնապը Շատ Վտանգաւոր Է, Եւ Կացութիւնը Հետզհետէ Կը Բարդանայ Ու Կը Վատթարանայ»
Կ՝ըսէ Լախտար Իպրահիմի։
Ռուսիոյ արտաքին գործոց նախարար Սերկէյ Լաւրով Սուրիոյ հարցով ՄԱԿ-ի եւ Արաբական լիկայի
յատուկ պատուիրակ Լախտար Իպրահիմիի հետ Մոսկուայի մէջ իր հանդիպումէն ետք միացեալ մամլոյ
ասուլիսի մը ընթացքին, կոչ ուղղեց Սուրիոյ մէջ զինադադար հաստատելու` նշելով, որ «պէտք
է Ժընեւի համաձայնութեան հիմամբ իշխանութեան եւ ընդդիմութեան միջեւ քաղաքական երկխօսութեան
սկսիլ»:Ան ցաւ յայտնեց Սուրիոյ մէջ Իպրահիմիի առաջարկած զինադադարի ձախողութեան համար` աւելցնելով, որ «չենք գիտեր, թէ Սուրիոյ մէջ զինադադարը ո՛վ խզեց»` սուրիական բոլոր կողմերուն կոչ ուղղելով «այս հոլովոյթին մէջ իրենց ժողովուրդին գթալու»:
Լաւրով ըսաւ, որ «պէտք է Դամասկոսի եւ ընդդիմութեան վրայ ճնշում բանեցնել` զինադադարի հաստատման եւ քաղաքական երկխօսութեան անցնելու համար»: Ան նաեւ ցաւ յայտնեց, որ Ժընեւի համաձայնութիւնը Ապահովութեան խորհուրդին կողմէ չվաւերացուեցաւ:
Իպրահիմի իր կարգին յայտնեց, որ «Ռուսիա Միջին Արեւելքի մէջ մեծ դերակատար մըն է եւ ուժեղ կերպով ներկայ է»` նշելով, որ «սուրիական տագնապը շատ վտանգաւոր է, եւ կացութիւնը հետզհետէ կը բարդանայ ու կը վատթարանայ»:
| All the contents on this site are copyrighted ©. |